അവസാന മുഗള് ഭരണാധികാരി ബഹാദൂര് ഷാ സഫറിന്റെ പിന്ഗാമിയെന്ന് അവകാശപ്പെടുന്ന ഹബീബുദ്ദീന് ടുസി രാജകുമാരന് അയോധ്യയില് രാമക്ഷേത്രത്തിന് പിന്തുണയുമായി രംഗത്ത്. അയോധ്യയില് രാമക്ഷേത്രം നിര്മ്മിക്കുമ്പോള് സ്വര്ണ്ണം കൊണ്ടുള്ള ഇഷ്ടികയാണ് ടുസി വാഗ്ദാനം ചെയ്തിരിക്കുന്നത്.
അതേസമയം ബാബറി മസ്ജിദ്-രാമജന്മഭൂമി സ്ഥിതി ചെയ്യുന്ന സ്ഥലം തനിക്ക് നല്കണമെന്നാണ് ഹബീബുദ്ദീന് ടുസിയുടെ മറ്റൊരു ആവശ്യം. ആദ്യ മുഗള് ഭരണാധികാരി ബാബറാണ് 1529-ല് അയോധ്യയില് ബാബറി മസ്ജിദ് നിര്മ്മിച്ചത്. അദ്ദേഹത്തിന്റെ പിന്തുടര്ച്ചക്കാരന് എന്ന നിലയില് ഭൂമിക്ക് തനിക്കാണ് അവകാശമെന്ന് ടുസി രാജകുമാരന് അവകാശപ്പെടുന്നു.
സുപ്രീംകോടതി ഈ ഭൂമി തനിക്ക് കൈമാറിയാല് ഇത് മുഴുവന് രാമക്ഷേത്രം നിര്മ്മിക്കാനായി സംഭാവന ചെയ്യുമെന്നും ടുസി പറഞ്ഞു. ബാബറി മസ്ജിദ് നിന്നിടത്ത് രാമക്ഷേത്രമാണ് വേണ്ടതെന്ന നിലപാടിനോട് തനിക്ക് യോജിപ്പാണ്. 1992 ഡിസംബര് 6-നാണ് കര്സേവകര് ബാബറി തകര്ത്തത്.
സുപ്രീംകോടതിയില് നടക്കുന്ന രാമജന്മഭൂമി തര്ക്കത്തില് തന്നെയും കേള്ക്കാന് തയ്യാറാകണമെന്ന് ആവശ്യപ്പെട്ട് 50-കാരനായ ടുസി ഹര്ജി നല്കിയിട്ടുണ്ട്. നേരത്തെ മൂന്ന് തവണ അയോധ്യാ സന്ദര്ശനം നടത്തിയ ടുസി ക്ഷേത്രദര്ശനം നടത്തുകയും ചെയ്തിരുന്നു. രാമക്ഷേത്രം തകര്ത്തതിന് ഹിന്ദു സമൂഹത്തോട് അദ്ദേഹം മാപ്പ് പറയുകയും ചെയ്തിരുന്നു.