ഉത്തര്പ്രദേശിലെ കൊടുംകുറ്റവാളി വികാസ് ദുബെ കൊല്ലപ്പെട്ടു. പൊലീസ് ഏറ്റുമുട്ടലിന് ഇടയിലാണ് കൊല്ലപ്പെട്ടതെന്ന് ദേശിയ മാധ്യമങ്ങള്. അറസ്റ്റ് ചെയ്ത് കൊണ്ടുവരുന്നതിനിടെ വാഹനം അപകടത്തില്പ്പെട്ടപ്പോള് ഓടാന് ശ്രമിച്ച ദുബെയെ വെടിവെക്കുകയായിരുന്നുവെന്ന് പൊലീസ് പറഞ്ഞു.
മധ്യപ്രദേശില് നിന്ന് കാണ്പൂരിലേക്ക് വന്ന പൊലീസ് ജീപ്പാണ് അപകടത്തില്പ്പെട്ടത്. നിരവധി തവണ വെടിയൊച്ച കേട്ടതായി നാട്ടുകാര് പറയുന്നു. എന്നാല് ഉത്തര്പ്രദേശ് പൊലീസ് വാര്ത്ത സ്ഥിരീകരിച്ചിട്ടില്ല.
ഉത്തര്പ്രദേശില് എട്ട് പോലീസുകാരെ കൊന്ന കേസിലെ മുഖ്യസൂത്രധാരനാണ് വികാസ് ദുബെ. മധ്യപ്രദേശിലെ ഉജ്ജയിനിയില് വച്ചാണ് ഇയാളെ പൊലീസ് അറസ്റ്റ് ചെയ്തത്. ഉജ്ജയിനിയിലെ മഹാകല് ക്ഷേത്രത്തിലേക്ക് പോവുകയായിരുന്ന വികാസിനെ സുരക്ഷാ ഉദ്യോഗസ്ഥര് തിരിച്ചറിയുകയായിരുന്നു. തുടര്ന്ന് പൊലീസിനെ വിവരമറിയിക്കുകയായിരുന്നു.
എട്ട് പോലീസുകാരെ കൊലപ്പെടുത്തിയ ശേഷം ഒളിവില് പോയ ദുബെയെ ആറ് ദിവസത്തിന് ശേഷമാണ് പോലീസ് സംഘം പിടികൂടിയത്.കഴിഞ്ഞ വ്യാഴാഴ്ച രാത്രിയാണ് തന്നെ പിടികൂടാനെത്തിയ പോലീസ് സംഘത്തെ വികാസ് ദുബെയും കൂട്ടാളികളും ആക്രമിച്ചത്. ഡിഎസ്പി അടക്കം എട്ട് പോലീസുകാരാണ് ആക്രമണത്തില് കൊല്ലപ്പെട്ടത്. ഈ സംഭവത്തിന് പിന്നാലെ വികാസ് ദുബെ ഒളിവില്പോവുകയായിരുന്നു.
