ഇക്കഴിഞ്ഞ ജനുവരി 23ന് സ്വിന്‍ഡനില്‍ മരണമടഞ്ഞ അരുണ്‍ വിന്‍സന്റിന് യാത്രാമൊഴിയേകി സ്വിന്‍ഡനിലെ മലയാളി സമൂഹം. വില്‍ഷെയര്‍ മലയാളി സമൂഹവും ബന്ധുമിത്രാദികളും ചേര്‍ന്നടങ്ങിയ വലിയൊരു മലയാളി സമൂഹമാണ് അന്ത്യോപചാരമര്‍പ്പിക്കുവാന്‍ സ്വിന്‍ഡനിലെ ഹോളി ഫാമിലി ചര്‍ച്ചില്‍ ഒത്തുചേര്‍ന്നത് .
സ്വപ്നങ്ങള്‍ മൊട്ടിടുന്നതിനു മുന്‍പായി അകാലത്തില്‍ യാത്രയാകേണ്ടിവന്ന അരുണ്‍ വിന്‍സെന്റിന്റെ പൊതുദര്‍ശന ശുശ്രൂഷകള്‍ ദുഃഖം ഏറെ തളം കെട്ടി നിന്ന അന്തരീക്ഷത്തിലാണ് നടന്നത്. അരുണ്‍ - ലിയ ദമ്പതികള്‍ക്ക് ആറും നാലും വയസ്സുള്ള രണ്ട് ആണ്‍കുട്ടികളാണുള്ളത്. അരുണിന്റെ വിയോഗത്തില്‍ തളര്‍ന്നുപോയ കുടുംബത്തോടൊപ്പം വലിയ സാന്ത്വനമായി വില്‍ഷെയര്‍ മലയാളീ സമൂഹം കൂടെയുണ്ട്. അരുണിന്റെ മൃതദേഹം നാട്ടിലെത്തിക്കുന്നതുള്‍പ്പെടെയുള്ള എല്ലാ ക്രമീകരണങ്ങളും വില്‍ഷെയര്‍ മലയാളീ അസോസിയേഷന്റെ നേതൃത്വത്തില്‍ നടന്നു വരുന്നു.
അസോസിയേഷന്റെ നേതൃത്വത്തില്‍ ഏറെ ഭംഗിയായും ചിട്ടയായും ആണ് പൊതുദര്‍ശന വേള ഇക്കഴിഞ്ഞ വെള്ളിയാഴ്ച്ച ക്രമീകരിക്കപ്പെട്ടത്.
പൊതുദര്‍ശനത്തോടനുബന്ധിച്ച് നടത്തപ്പെട്ട വിശുദ്ധ കുര്‍ബാനയില്‍ ഫാദര്‍ ഷാല്‍ബിന്‍ മരോട്ടിക്കുഴി മുഖ്യകാര്‍മികത്വം വഹിച്ചു. തുടര്‍ന്ന് വില്‍ഷെയര്‍ മലയാളി അസോസിയേഷന്റെ നേതൃത്വത്തില്‍ നടത്തപ്പെട്ട അനുശോചന സമ്മേളനത്തില്‍ പ്രസിഡന്റ് ജിജി സജി അധ്യക്ഷത വഹിച്ച് അനുശോചനമറിയിക്കുകയുണ്ടായി. വില്‍ഷെയര്‍ മലയാളി അസോസിയേഷന്‍ സെക്രട്ടറി ഷിബിന്‍ വര്‍ഗീസ് അനുശോചനയോഗം ഏറെ കൃത്യതയോടെ ക്രോഡീകരിച്ചു.
പൊതുദര്‍ശനത്തോടനുബന്ധിച്ച് നടത്തിയ അനുശോചന സമ്മേളനത്തില്‍ അഭിവന്ദ്യ അബ്രഹാം മാര്‍ സ്‌തേഫാനോസ് മെട്രോപൊളിറ്റന്‍ തിരുമേനി അനുശോചനം അറിയിച്ചു പ്രാര്‍ത്ഥിക്കുകയുണ്ടായി. ഹോളി ഫാമിലി പള്ളി ഇടവക വികാരി ഫാദര്‍ നാം ഡി ഓബി, ക്‌നാനായ ജാക്കോബൈറ്റ് കമ്മ്യൂണിറ്റിക്ക് വേണ്ടി ഫാദര്‍ സിജോ ജോസഫ്, സെന്റ് ജോര്‍ജ് ഗ്രിഗോറിയോസ് ഓര്‍ത്തഡോക്‌സ് ചര്‍ച്ചിനെ പ്രതിനിധീകരിച്ച് ഫാദര്‍ എബി ഫിലിപ്പ് , ഇന്ത്യന്‍ പെന്തകൊസ്തു കമ്മ്യൂണിറ്റി, സീനായി മിഷനുവേണ്ടി പാസ്റ്റര്‍ സിജോ ജോയ് എന്നിവര്‍ പ്രാര്‍ത്ഥനാപൂര്‍വ്വം അന്ത്യോപചാരമാര്‍പ്പിച്ചു . തുടര്‍ന്ന് അസോസിയേഷന്‍ മുന്‍പ്രസിഡന്റ് പ്രിന്‍സ്‌മോന്‍ മാത്യു, ജിജി വിക്ടര്‍, ഗ്രേറ്റ് വെസ്റ്റേണ്‍ ഹോസ്പിറ്റലിലെ വിവിധ വാര്‍ഡുകളെ പ്രതിനിധീകരിച്ചു വാര്‍ഡ് പ്രതിനിധികളും അന്തിമോപചാരമര്‍പ്പിച്ചു. സീറോ മലബാര്‍ സ്വിന്‍ഡന്‍ കമ്മ്യൂണിറ്റിക്ക് വേണ്ടി ശ്രീ ജോര്‍ജ് കുര്യാക്കോസും ബേബി ചീരനും അനുശോചനം അറിയിച്ചു.
സ്വിന്‍ഡന്‍ ക്‌നാനായ മിഷനുവേണ്ടി മാത്യു ജെയിംസ്, വിവിധ സംഘടനകളെയും കൂട്ടായ്മകളെയും പ്രതിനിധീകരിച്ച് റെയ്മോള്‍ നിധീരി, പൂര്‍ണിമ മേനോന്‍ അഞ്ജന സുജിത്ത് എന്നിവര്‍ അനുശോചനം അര്‍പ്പിക്കുകയുണ്ടായി. തുടര്‍ന്ന് അരുണ്‍ വിന്‍സന്റിന്റെ കുടുംബത്തിന് വേണ്ടി റോസ്മിയും വില്‍ഷെയര്‍ മലയാളി അസ്സോസിയേഷനുവേണ്ടി ട്രെഷറര്‍ കൃതീഷ് കൃഷ്ണന്‍ നന്ദിയും അറിയിച്ചു. സംസ്‌കാര തിയതി പിന്നീടറിയിക്കുന്നതായിരിക്കും.
