ഡിഎംആര്സി മുന് മുഖ്യ ഉപദേഷ്ടാവ് ഇ ശ്രീധരന്റെ അതിവേഗ റെയില് പദ്ധതി അനിശ്ചിതത്വത്തില്. കേന്ദ്ര സര്ക്കാര് ഇതുവരെ പദ്ധതി പ്രഖ്യാപിക്കാത്തതാണ് ആശയക്കുഴപ്പം ഉണ്ടാക്കുന്നത്. പൊന്നാനിയില് ഇ ശ്രീധരന് തുറന്ന ഓഫീസിന്റെ പ്രവര്ത്തനവും വഴിമുട്ടി. ഓഫീസ് തുറന്ന് അഞ്ചു ദിവസം പിന്നിട്ടിട്ടും ഉദ്യോഗസ്ഥര് ആരും എത്തിയില്ല. ഡിഎംആര്സിയുടെ ഉദ്യോഗസ്ഥര് എത്തുമെന്നായിരുന്നു ശ്രീധരന് പറഞ്ഞിരുന്നത്. പദ്ധതിയെക്കുറിച്ച് വിവരം ലഭിക്കാത്തതിനാല് സംസ്ഥാന ബിജെപി നേതാക്കളും ആശയക്കുഴപ്പത്തിലാണ്.
അതിവേഗ റെയില് പദ്ധതിയുമായി ബന്ധപ്പെട്ട് ഇക്കഴിഞ്ഞ കേന്ദ്ര ബജറ്റില് പ്രഖ്യാപനങ്ങളൊന്നും ഉണ്ടായിരുന്നില്ല. പദ്ധതിയുമായി ബന്ധപ്പെട്ട് കേന്ദ്ര റെയില്വേ മന്ത്രി അശ്വിനി വൈഷ്ണവിനും വ്യക്തതയില്ല. ഇന്നലെ രാജ്യസഭയില് എംപിമാരായ ഹാരിസ് ബീരാനും ജോണ് ബ്രിട്ടാനും ഇ ശ്രീധരന്റെ 'റോള്' സംബന്ധിച്ച് ചോദ്യം ഉന്നയിച്ചിരുന്നു. 'അതിവേഗ റെയില്പാതയില് ഇ ശ്രീധരെ എന്തെങ്കിലും ചുമതല ഏല്പിച്ചിട്ടുണ്ടോ' എന്നായിരുന്നു ചോദ്യം. എന്നാല് ഇത് സംബന്ധിച്ച് വ്യക്തമായ മറുപടി നല്കാന് കേന്ദ്രമന്ത്രി തയ്യാറായില്ല. രാജ്യം തന്നെ ആദരിക്കുന്ന ആളാണ് ശ്രീധരന് എന്നും അദ്ദേഹം പൊന്നാനിയില് ഓഫീസ് തുറന്നിട്ടുണ്ടെങ്കില് സ്വാഗതം ചെയ്യുന്നുവെന്നുമായിരുന്നു കേന്ദ്രമന്ത്രി പറഞ്ഞത്. റെയില്വേയുടെ വികസനത്തിനായുള്ള ശ്രീധരന്റെ നീക്കങ്ങള്ക്ക് പിന്തുണ നല്കുന്നതായും അശ്വിനി വൈഷ്ണവ് പറഞ്ഞിരുന്നു. ഇതിന് അപ്പുറത്തേയ്ക്ക് ഇ ശ്രീധരന് നല്കിയിരിക്കുന്ന ചുമതലയെന്താണ് എന്നത് സംബന്ധിച്ചോ പദ്ധതിയുടെ മറ്റ് കാര്യങ്ങളെക്കുറിച്ചോ പറയാന് കേന്ദ്രമന്ത്രി തയ്യാറായില്ല.
