മധ്യപ്രദേശില് വരണമാല ചടങ്ങിനിടെ അതിഥികളെ സാക്ഷിയാക്കി വധു കാമുകനൊപ്പം വേദിയില് നിന്ന് ഓടിപ്പോയ വാര്ത്ത സമൂഹ മാധ്യമങ്ങളില് വലിയ ചര്ച്ചയാകുന്നു. വധു പെട്ടെന്ന് വേദിയില് നിന്ന് ഇറങ്ങിപ്പോകുന്ന വീഡിയോ ഇപ്പോള് എക്സില് വ്യാപകമായി പ്രചരിക്കുന്നുണ്ട്.
വിവാഹങ്ങളിലെ വീട്ടുകാരുടെ സമ്മര്ദ്ദം, പ്രണയം, വധുവിന്റെയും വരന്റെയും കുടുംബങ്ങള്ക്കുണ്ടാകുന്ന മാനസിക വിഷമങ്ങള് എന്നിവയെക്കുറിച്ചുള്ള വലിയ ചര്ച്ചകള്ക്കാണ് ഈ വീഡിയോ വഴിതെളിച്ചത്.
മധ്യപ്രദേശിലെ ഛിന്ദ്വാര ജില്ലയിലുള്ള ഉംറേത്ത് ഗ്രാമത്തില് ഏപ്രില് 27-28 രാത്രിയിലാണ് ഈ സംഭവം നടന്നത്. പരാസിയയില് നിന്നെത്തിയ വരനും വധുവും തമ്മിലുള്ള വരണമാല ചടങ്ങിനുള്ള തയ്യാറെടുപ്പുകള് നടക്കുകയായിരുന്നു. വരന് വേദിയില് നില്ക്കുമ്പോള് മാലയുമായി എത്തിയ വധു, പെട്ടെന്ന് വേദിയില് നിന്ന് ചാടി ഓടുകയായിരുന്നു. റിപ്പോര്ട്ടുകള് പ്രകാരം, വിവാഹ സ്ഥലത്തുണ്ടായിരുന്ന തന്റെ കാമുകന്റെ അടുത്തേക്ക് ഓടിയെത്തിയ വധു, അയാളെ കെട്ടിപ്പിടിക്കുകയും കഴുത്തില് മാല അണിയിക്കുകയും ചെയ്തു.
ഈ സംഭവത്തിന് പിന്നാലെ വധുവിന്റെ വീട്ടുകാര് കാമുകനെ പിടികൂടി മര്ദിക്കുകയും വിവാഹ സ്ഥലത്ത് നിന്ന് പുറത്താക്കുകയും ചെയ്തു. ഇതോടെ വധുവിന്റെയും വരന്റെയും കുടുംബങ്ങള് തമ്മില് തര്ക്കവും സംഘര്ഷവും ഉണ്ടായി. അപമാനം നേരിട്ട വരന് വിവാഹം വേണ്ടെന്ന് വെച്ച് തന്റെ വീട്ടുകാര്ക്കൊപ്പം മടങ്ങിപ്പോയി.
ഏകദേശം രണ്ട് വര്ഷമായി വധുവും കാമുകനും പ്രണയത്തിലായിരുന്നുവെന്നും വീട്ടുകാര്ക്ക് ഇക്കാര്യം അറിയാമായിരുന്നുവെന്നും റിപ്പോര്ട്ടുകള് പറയുന്നു. എന്നാല് വീട്ടുകാരുടെ നിര്ബന്ധത്തിന് വഴങ്ങിയാണ് യുവതി വിവാഹത്തിന് സമ്മതിച്ചത്. സാമ്പത്തിക നഷ്ടവും മാനസിക വിഷമവും ചൂണ്ടിക്കാട്ടി വരന്റെ കുടുംബം പോലീസില് പരാതി നല്കിയിട്ടുണ്ട്. വിവാഹത്തിന്റെ ഭാഗമായി നല്കിയ ആഭരണങ്ങളും മൊബൈല് ഫോണും അവര് തിരികെ വാങ്ങി.
