കൊച്ചിയിലെ ഫ്‌ലാറ്റില്‍ വച്ച് മര്‍ദിച്ചു എന്ന മാനേജര്‍ വിപിന്‍ കുമാറിന്റെ പരാതിയില്‍ പരസ്യ പ്രതികരണവുമായി നടന്‍ ഉണ്ണി മുകുന്ദന്‍ . ഇദ്ദേഹത്തെ ഔദ്യോഗികമായി തന്റെ മാനേജര്‍ ആക്കിയിട്ടില്ല എന്ന് ഉണ്ണി മുകുന്ദന്‍ ആവര്‍ത്തിച്ചു. നേരത്തെ മനോരമ ഓണ്‍ലൈന് നല്‍കിയ അഭിമുഖത്തിലും ഉണ്ണി മുകുന്ദന്‍ ഇതേ കാര്യം പറഞ്ഞിരുന്നു. 2018 മുതലുള്ള പരിചയം വളരെ മോശം നിലയില്‍ എത്തിച്ചേര്‍ന്നിരിക്കുന്നു എന്ന് ഉണ്ണി മുകുന്ദന്‍ ഫേസ്ബുക്കില്‍ പോസ്റ്റ് ചെയ്ത കുറിപ്പില്‍ ആരോപിച്ചു. വിപിന്‍ കുമാറിനെ പരിചയപ്പെട്ട നാള്‍ മുതലുള്ള കാര്യങ്ങള്‍ ഉണ്ണി മുകുന്ദന്റെ ഭാഷ്യത്തില്‍ ചുവടെ നല്‍കുന്നു. ഫേസ്ബുക്ക് പോസ്റ്റിന്റെ തര്‍ജമ.
'2018 ഓടെ എന്റെ സ്വന്തം നിര്‍മാണത്തില്‍ എന്റെ ആദ്യ സിനിമ നിര്‍മ്മിക്കാന്‍ പോകുമ്പോഴാണ് വിപിന്‍ കുമാര്‍ എന്നെ ബന്ധപ്പെട്ടത്. ചലച്ചിത്ര മേഖലയിലെ പ്രശസ്തരായ നിരവധി സെലിബ്രിറ്റികളുടെ പിആര്‍ഒ ആണെന്ന് അദ്ദേഹം സ്വയം പരിചയപ്പെടുത്തി. അദ്ദേഹത്തെ ഒരിക്കലും എന്റെ പേഴ്സണല്‍ മാനേജരായി നിയമിച്ചിട്ടില്ലെന്ന് രേഖകള്‍ പറയും.
അടുത്തിടെ പുറത്തിറങ്ങിയ മാര്‍ക്കോയുടെ ഷൂട്ടിംഗിനിടെയാണ് വിപിനുമായുള്ള എന്റെ ആദ്യ പ്രശ്നം ഉണ്ടായത്. സെബാന്‍ നയിക്കുന്ന ഒബ്സ്‌ക്യൂറ എന്റര്‍ടൈന്‍മെന്റിലെ ജീവനക്കാരനുമായി അദ്ദേഹത്തിന് ഒരു വലിയ പ്രശ്നമുണ്ടായി. ഇക്കാര്യം പരസ്യമായി. അത് സിനിമയുടെ കാര്യത്തില്‍ അങ്ങേയറ്റം നിരാശാജനകമായിരുന്നു. ഈ സിനിമയുടെ മുഴുവന്‍ ക്രെഡിറ്റും നല്‍കാത്തതിന് വിപിന്‍ എന്നെ ശകാരിച്ചിരുന്നു, അത് എന്റെ ധാര്‍മ്മികതയ്ക്ക് ചേരില്ല.
കൂടാതെ, എന്റെ ജോലിയെ മോശമായി ബാധിക്കുന്ന നിരവധി പ്രശ്നങ്ങള്‍ ഈ വ്യക്തി കാരണം സംഭവിക്കുന്നുണ്ടെന്ന് എന്റെ ശ്രദ്ധയില്‍പ്പെട്ടു. പുതിയതും പ്രശസ്തരുമായ സിനിമാ നിര്‍മ്മാതാക്കളില്‍ നിന്ന് ഗോസിപ്പുകള്‍ക്കും മോശം സംസാരങ്ങള്‍ക്കും വിപിനെതിരെ നിരവധി പരാതികള്‍ ലഭിക്കാന്‍ തുടങ്ങി. ഒരു സഹപ്രവര്‍ത്തകന്‍ എന്ന നിലയിലും, സുഹൃത്ത് എന്ന നിലയിലും ഈ വ്യക്തി ക്ഷമിക്കാനാകാത്ത ഒരു പ്രവൃത്തി ചെയ്തു.
എന്തായാലും, അദ്ദേഹത്തെ നേരിട്ട് കണ്ടപ്പോള്‍, അദ്ദേഹം എന്റെ എല്ലാ ആശങ്കകളും അവഗണിച്ചു. ഇന്‍ഡസ്ട്രിയിലെ എന്റെ കുറച്ച് സുഹൃത്തുക്കളുടെ പിന്തുണ തനിക്കുണ്ടെന്ന് അദ്ദേഹം അവകാശപ്പെടുന്നു. പിന്നീട് അദ്ദേഹം എന്റെയും വിഷ്ണു ഉണ്ണിത്താനും (മനോരമ ഓണ്‍ലൈനിന് നല്‍കിയ ഒരു അഭിമുഖത്തില്‍ ഇത് സ്ഥിരീകരിച്ച സുഹൃത്ത്) മുന്നില്‍ ചെയ്ത എല്ലാ തെറ്റുകള്‍ക്കും ക്ഷമാപണം നടത്തി.
എന്റെ എല്ലാ ഡിജിറ്റല്‍ ഡാറ്റയും അദ്ദേഹത്തിന് ലഭ്യമായിരുന്നതിനാല്‍, ഞാന്‍ അദ്ദേഹത്തോട് രേഖാമൂലമുള്ള ക്ഷമാപണം നടത്താന്‍ ആവശ്യപ്പെട്ടു. അദ്ദേഹം അത് അയച്ചില്ല, പകരം ന്യൂസ് പോര്‍ട്ടലുകളിലും സോഷ്യല്‍ മീഡിയയിലും എനിക്കെതിരെ പ്രചരിക്കുന്ന തികച്ചും തെറ്റായ, വ്യാജവും ഭയാനകവുമായ ആരോപണങ്ങള്‍ ഞാന്‍ കണ്ടു.
അദ്ദേഹം അവകാശപ്പെടുന്നതുപോലെ ഒരു സമയത്തും ശാരീരിക ആക്രമണവും ഉണ്ടായിട്ടില്ല, ഉന്നയിച്ച ആരോപണങ്ങള്‍ തികച്ചും വ്യാജവും അസത്യവുമാണ്. മുഴുവന്‍ സ്ഥലവും സിസിടിവി സ്‌കാനിംഗിന് കീഴിലാണ്. ഏതെങ്കിലും നിഗമനത്തിലെത്തുന്നതിനുമുമ്പ് ദയവായി അത് പരിശോധിക്കുക.
ഞാന്‍ അഞ്ചു വര്‍ഷത്തേക്ക് വളരെ തിരക്കിലാണെന്നും ഈ വ്യക്തി ആളുകളോട് പറയുന്നുണ്ടെന്നും എനിക്ക് മനസ്സിലായി. അതെന്റെ അവസരങ്ങള്‍ കുറയുന്നതിനു കാരണമായി. എന്നെക്കുറിച്ച് മനുഷ്യത്വരഹിതമായ കിംവദന്തികള്‍ അദ്ദേഹം പ്രചരിപ്പിച്ചു. ഒരു നടിയെ ബന്ധപ്പെടുകയും എന്നെ വിവാഹം കഴിക്കാന്‍ ആവശ്യപ്പെടുകയും ചെയ്തു. ഇത് ഞാനും അദ്ദേഹവും തമ്മില്‍ വലിയ വഴക്കിന് കാരണമായി. സമൂഹത്തില്‍ എന്നെ അപകീര്‍ത്തിപ്പെടുത്താന്‍ തന്റെ സോഴ്‌സുകള്‍ ഉപയോഗിക്കുമെന്ന് അദ്ദേഹം എന്നെ ഭീഷണിപ്പെടുത്തി. എന്റെ സഹപ്രവര്‍ത്തകരുമായി എനിക്ക് എപ്പോഴും ഒരു പ്രൊഫഷണല്‍ ബന്ധം ഉണ്ടായിരുന്നു, പക്ഷേ ഈ വ്യക്തി അങ്ങേയറ്റം അപകടകരമാണ്.
ഈ വ്യക്തി പറയുന്ന ഓരോ വാക്കും തികഞ്ഞ നുണയാണ്. എല്ലാ ആരോപണങ്ങളും ഞാന്‍ നിഷേധിക്കുന്നു. എന്നെ എളുപ്പത്തില്‍ ലക്ഷ്യമിട്ടെന്നു മാത്രം. ചില അനാവശ്യ നേട്ടങ്ങള്‍ക്കു വേണ്ടി അയാള്‍ എന്നെ ഭീഷണിപ്പെടുത്തുകയും ഉപദ്രവിക്കുകയും ചെയ്യുന്നു.
എന്റെ വ്യക്തിപരവും തൊഴില്‍പരവുമായ ജീവിതത്തില്‍ സന്തുഷ്ടരല്ലാത്ത ചിലര്‍ എന്റെ കരിയര്‍ നശിപ്പിക്കാന്‍ സഹായിക്കുന്നുവെന്ന് ഞാന്‍ ശക്തമായി വിശ്വസിക്കുന്നു. കഠിനാധ്വാനത്തിലൂടെയും സ്ഥിരോത്സാഹത്തിലൂടെയുമാണ് ഞാന്‍ ഈ കരിയര്‍ കെട്ടിപ്പടുത്തത്.
ഏതു തരം ഇരയാക്കലിനും പീഡനത്തിനും വിധേയമായാലും ഞാന്‍ സത്യത്തില്‍ വിശ്വസിക്കുന്നു.
