കാളിപൂജ പന്തലില്‍ പാട്ടുവയ്ക്കുന്നതുമായി ബന്ധപ്പെട്ട തര്‍ക്കത്തിനിടെ യുവാവിന് ദാരുണാന്ത്യം. പശ്ചിമ ബംഗാളിലെ സൗത്ത് 24 പര്‍ഗാനാസ് ജില്ലയിലെ സോനാര്‍പൂരിലാണ് സംഭവം. 30 കാരനായ സന്താന്‍ നസ്‌കര്‍ ആണ് അയല്‍വാസിയുടെ കുത്തേറ്റ് മരിച്ചത്. വ്യാഴാഴ്ചയാണ് സംഭവം. കാളിപൂജയ്ക്കിടെ ഉച്ചത്തില്‍ പാട്ടുവച്ചതിനെ തുടര്‍ന്ന് അയല്‍വാസിയായ വയോധികന് അസ്വാസ്ഥ്യം തോന്നുകയും പാട്ടിന്റെ ശബ്ദം കുറയ്ക്കാന്‍ ആവശ്യപ്പെടുകയും ചെയ്തു. ഹൃദയ സംബന്ധമായ അസുഖമുള്ള വയോധികന്റെ ആവശ്യത്തെ തുടര്‍ന്ന് സമീപവാസിയായ യുവാവ് പന്തലിലെ സൗണ്ട് സിസ്റ്റം നിര്‍ത്തിവച്ചു.
ഇതിന് പിന്നാലെ വീട്ടിലേക്ക് മടങ്ങിയ നസ്‌കറിനെ പിന്തുടര്‍ന്നെത്തിയ അയല്‍ക്കാരായ ദമ്പതികള്‍ ഇയാളെ ചോദ്യം ചെയ്തു. പന്തലില്‍ എന്തിനാണ് പാട്ട് നിര്‍ത്തിവച്ചതെന്നു ചോദിച്ചു തര്‍ക്കമായി. തര്‍ക്കത്തിനിടെ നസ്‌കറിന്റെ അമ്മയെ ദമ്പതികള്‍ ആക്രമിച്ചു. അമ്മയെ രക്ഷിക്കുന്നതിനിടെ ഇവരിലൊരാള്‍ നസ്‌കറിനെ പലതവണ ആഞ്ഞുകുത്തുകയായിരുന്നു. പിന്നാലെ പ്രതികള്‍ സംഭവ സ്ഥലത്തു നിന്നും ഓടി രക്ഷപ്പെട്ടു. ഉടന്‍ തന്നെ നസ്‌കറിനെ അടുത്തുള്ള ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
