മറ്റ് സ്ത്രീകളെ നോക്കിയതിന് കാമുകന്റെ കണ്ണില്‍ സൂചികള്‍കൊണ്ട് കുത്തിപ്പരിക്കേല്‍പ്പിച്ച് 44 കാരി. അമേരിക്കയിലെ ഫ്‌ലോറിഡയിലാണ് സംഭവം. സാന്ദ്ര ജിംനെസ് നായ്ക്കള്‍ക്കെടുക്കാന്‍ കൊണ്ടുവന്ന റാബിസ് ഷോട്ട്‌സ്, കാമുകന്റെ കണ്ണില്‍ കുത്തിയിറക്കുകയായിരുന്നു.
കണ്ണിന് സാരമായി പരിക്കേറ്റയാളെ ആശുപത്രിയിലേക്ക് മാറ്റിയെന്നാണ് റിപ്പോര്‍ട്ട്. മിയാമി ഡേഡ് കൗണ്ടിയില്‍ ശനിയാഴ്ചയായിരുന്നു സംഭവം. കഴിഞ്ഞ എട്ടുവര്‍ഷമായി ഇരുവരും ഡേറ്റിംഗിലാണ്. ഇതിനിടെ ഇരുവരും തമ്മില്‍ വാക്കുതര്‍ക്കമുണ്ടാകുകയും ഇത് ആക്രമണത്തില്‍ കലാശിക്കുകയുമായിരുന്നു.
താന്‍ കിടക്കുകയായിരുന്നുവെന്നും അപ്പോള്‍ ജിംനെസ് തന്റെ ശരീരത്തിലേക്ക് ചാടിക്കയറി രണ്ട് സൂചികള്‍കൊണ്ടും കണ്ണില്‍ കുത്തുകയായിരുന്നുവെന്നും ഇയാള്‍ പറഞ്ഞു. വലത് കണ്ണിലാണ് കുത്തേറ്റത്. ഉടന്‍ തന്നെ ജിംനെസ് സ്ഥലത്തുനിന്ന് ഓടി രക്ഷപ്പെട്ടു. പിന്നീട് പൊലീസെത്തിയപ്പോള്‍ ജിംനെസ് താമസസ്ഥലത്തിന് പുറത്ത് കാറില്‍ ഉറങ്ങിക്കിടക്കുന്നതാണ് കണ്ടത്. താന്‍ കുറ്റം ചെയ്തിട്ടില്ലെന്നും കാമുകന്‍ സ്വയം കണ്ണില്‍ കുത്തിയതാണെന്നുമാണ് ജിംനെസിന്റെ വാദം.
