ലേബര് ഗവണ്മെന്റ് അധികാരത്തില് എത്തിയത് മുതല് യുകെ സമ്പദ് വ്യവസ്ഥയെ കുറിച്ച് ശുഭകരമായ വാര്ത്തകളൊന്നും പങ്കുവെയ്ക്കുന്നില്ല. എല്ലാ മേഖലയിലും പ്രതിസന്ധിയെന്നാണ് മന്ത്രിമാര് പറഞ്ഞുനടക്കുന്നത്. എന്നാല് ഇതിന് പിന്നില് ബജറ്റില് നികുതി കൂട്ടാനുള്ള ഒരുക്കമാണെന്ന് ടോറികളും തിരിച്ചടിക്കുന്നു.
ഈ ഘട്ടത്തിലാണ് പ്രവചനങ്ങള് അസ്ഥാനത്താക്കി യുകെ സമ്പദ് വ്യവസ്ഥ വളര്ച്ചയുടെ പാതയിലേക്ക് തിരിച്ചെത്തിയത്. രണ്ട് മാസം തുടര്ച്ചയായി സ്തംഭിച്ച ശേഷമാണ് പുതിയ ഔദ്യോഗിക കണക്കുകള് വളര്ച്ച ഉറപ്പിക്കുന്നത്. ആഗസ്റ്റില് ഗ്രോസ് ഡൊമസ്റ്റിക് പ്രൊഡക്ട്- ജിഡിപി 0.2 ശതമാനമാണെന്നാണ് നാഷണല് സ്റ്റാറ്റിസ്റ്റിക്സ് ഓഫീസ് വ്യക്തമാക്കുന്നത്.
ജൂണ്, ജൂലൈ മാസങ്ങളില് രേഖപ്പെടുത്തി പൂജ്യം ശതമാനത്തില് നിന്നും നേരിയ വര്ദ്ധനവാണ് നേടിയിരിക്കുന്നത്. എന്നാല് ചാന്സലര് റേച്ചല് റീവ്സിന് ഈ വാര്ത്ത ആശ്വാസം നല്കുന്നില്ല. ഈ മാസം ഒടുവില് ഓട്ടം ബജറ്റ് അവതരിപ്പിക്കാനുള്ള ഒരുക്കത്തിലാണ് ചാന്സലര്.
രാജ്യത്തിന്റെ സമ്പദ് വ്യവസ്ഥയെ കുറിച്ചുള്ള പ്രകടനം അളക്കാനുള്ള സൂചകമാണ് ജിഡിപി. സര്വ്വീസ് മേഖലയാണ് വളര്ച്ചയിലേക്ക് പ്രധാനമായി സംഭാവന നല്കിയത്. ചെറുകിട ഉത്പാദന മേഖലയില് 0.5 ശതമാനം വളര്ച്ചയും കൈവരിച്ചു.