364 വര്ഷത്തെ പാരമ്പര്യമുള്ള സ്ഥാപനമാണ് ബ്രിട്ടന്റെ പോസ്റ്റ് ഓഫീസുകള്. രാജ്യത്തിന്റെ ഉടമസ്ഥതയിലുള്ള ഈ സ്ഥാപനം ബ്രിട്ടനിലെ ഏറ്റവും വലിയ റീട്ടെയില് ശൃംഖലയുമാണ്. ഏകദേശം 11,500 ബ്രാഞ്ചുകളാണ് പോസ്റ്റ് ഓഫീസിനുള്ളത്. എന്നാല് വര്ഷങ്ങളുടെ പാരമ്പര്യവും, വലുപ്പവുമൊക്കെ അവകാശപ്പെടാന് കഴിയുമെങ്കിലും ഹൊറിസോണ് ഐടി തട്ടിപ്പില് സ്വന്തം ജീവനക്കാരെ കുറ്റവാളികളാക്കി മുദ്രകുത്തിയതിന്റെ പേരില് നാണക്കേട് ഏറ്റുവാങ്ങുകയാണ് പോസ്റ്റ് ഓഫീസ്.
ഈ ഘട്ടത്തിലാണ് നാണക്കേട് മാറ്റാന് പോസ്റ്റ് ഓഫീസുകളെ സബ്-പോസ്റ്റ്മാസ്റ്റര്മാര്ക്ക് കൈമാറാന് നീക്കം നടക്കുന്നത്. ഹൊറിസോണ് ഐടി തട്ടിപ്പിന്റെ പേരില് ഭാവി തുലാസിലായതോടെയാണ് ഈ രക്ഷാപ്രവര്ത്തനം. ഇതോടെ പോസ്റ്റ് ഓഫീസ് ഉടമസ്ഥത ജീവനക്കാര്ക്ക് കൈമാറാനാണ് മന്ത്രിമാര് ആലോചിക്കുന്നത്.
ജീവനക്കാര് കമ്പനിയുടെ ഭാഗിക ഉടമകളായി മാറുകയും, വാര്ഷിക ലാഭത്തിന്റെ ഓഹരി വിഹിതം ലഭിക്കുകയും ചെയ്യുന്ന രീതിയിലാകും ഇത്. പോസ്റ്റ് ഓഫീസ് ജീവനക്കാര്ക്ക് കൈമാറാനുള്ള പദ്ധതികള് പരിശോധിക്കാന് മാനേജ്മെന്റ് കണ്സള്ട്ടന്സി സ്ഥാപനമായ ബിസിജിയെ ബിസിനസ്സ് & ട്രേഡ് ഡിപ്പാര്ട്ട്മെന്റ് ചുമതലപ്പെടുത്തിയിട്ടുണ്ട്.
വരും മാസങ്ങളില് ബിസിനസ്സ് സെക്രട്ടറി ജോന്നാഥന് റെയ്നോള്ഡ്സിന് റിപ്പോര്ട്ട് കൈമാറുമെന്നാണ് കരുതുന്നത്. പോസ്റ്റ് ഓഫീസ് നിലവില് ഗവണ്മെന്റ് സബ്സിഡി കൊണ്ട് മാത്രമാണ് പിടിച്ചുനില്ക്കുന്നതെന്ന് വൈറ്റ്ഹാള് അധികൃതര് വെളിപ്പെടുത്തുന്നു. ഈ ഘട്ടത്തിലാണ് സബ് പോസ്റ്റ്മാസ്റ്റര്മാരുമായുള്ള ബന്ധം മെച്ചപ്പെടുത്താന് ഈ നീക്കം നടത്തുന്നത്.