631000 കോടി രൂപ ചെലവായ വിവാഹ മോചനത്തിന് പിന്നാലെ തനിക്ക് സീരിയസായൊരു കാമുകിയുണ്ടെന്ന് വ്യക്തമാക്കി മൈക്രോസോഫ്റ്റ് സഹസ്ഥാപകന്‍ ബില്‍ ഗേറ്റ്സ്. മെലിന്‍ഡയുമായുള്ള വിവാഹബന്ധത്തിലെ തകരാറുകളേക്കുറിച്ച് അടുത്തിടെ ബില്‍ ഗേറ്റ്സ് തുറന്ന് പറഞ്ഞിരുന്നു. ഇതിന് പിന്നാലെയാണ് പൌള ഹാഡുമായി പ്രണയത്തിലാണെന്ന് മുന്‍ മൈക്രോസോഫ്റ്റ് സിഇഒ വ്യക്തമാക്കിയത്. ചൊവ്വാഴ്ചയാണ് ബില്‍ഗേറ്റ്‌സ് കാമുകിയേക്കുറിച്ച് തുറന്ന് സംസാരിച്ചത്.
സീരിയസ് ആയിട്ടുള്ള കാമുകിയായി പൌളയെ ലഭിച്ചതില്‍ താന്‍ ഭാഗ്യവാനാണെന്നും തങ്ങള്‍ ഒരുമിച്ച് മികച്ച രീതിയില്‍ സമയം ചെലവിടുന്നതായും ഒളിംപിക്‌സിന് ഒരുമിച്ച് പോകുന്നുമെന്നും നല്ല കാര്യങ്ങള്‍ വരുന്നതായുമാണ് ബില്‍ഗേറ്റ്‌സ് പ്രതികരിച്ചത്. ബില്‍ഗേറ്റ്‌സും ഒറക്കിള്‍ സിഇഒയുടെ വിധവയായ പൌളയും തമ്മില്‍ പ്രണയത്തിലാണെന്ന് 2023 മുതല്‍ അഭ്യൂഹങ്ങളുണ്ടായിരുന്നു. മെലിന്‍ഡയുമായി വിവാഹ ബന്ധം അവസാനിപ്പിച്ചതിന് പിന്നാലെയായിരുന്നു ഈ അഭ്യൂഹങ്ങള്‍ വ്യാപകമായത്. എന്നാല്‍ ബില്‍ഗേറ്റ്‌സ് തന്നെ ഇക്കാര്യം സ്ഥിരീകരിച്ചിരിക്കുകയാണ്.
ഓറക്കിള്‍ ആന്‍ഡ് ഹെല്‍വെറ്റ് പാക്കാര്‍ഡിന്റെ മുന്‍ സിഇഒ ആയിരുന്ന മാര്‍ക്ക് ഹഡിന്റെ വിധവയാണ് 62കാരിയായ പൌള. 1984ല്‍ ഓസ്റ്റിനിലെ ടെക്‌സാസ് സര്‍വ്വകലാശാലയില്‍ നിന്ന് ബിരുദം പൂര്‍ത്തിയാക്കിയ ശേഷം എന്‍സിആര്‍ കോര്‍പ്പറേഷനില്‍ സെയില്‍ ആന്‍ഡ് അലയന്‍സ് വിഭാഗത്തില്‍ ഉന്നത ജീവനക്കാരിയായിരുന്നു പൌള. കഴിഞ്ഞ വര്‍ഷം അനന്ത് അംബാനിയുടെ വിവാഹത്തിന് മുന്നോടിയായുള്ള ആഘോഷങ്ങളില്‍ ബില്‍ ഗേറ്റ്സ് പൌളയ്ക്ക് ഒപ്പമാണ് പങ്കെടുത്തത്.
2021ലാണ് ബില്‍ഗേറ്റ്‌സും മെലിന്‍ഡയും വേര്‍പിരിയുന്നതായി പ്രഖ്യാപിച്ചത്. 27 വര്‍ഷത്തെ വിവാഹത്തിന് പിന്നാലെയായിരുന്നു ഇത്. ലോകത്തിലെ തന്നെ ഏറ്റവും ചെലവേറിയ വിവാഹമോചനങ്ങളിലൊന്നായിരുന്നു ഗേറ്റ്സ് ദമ്പതികളുടേത്. 2021-ല്‍ മെലിന്‍ഡ ഗേറ്റ്‌സുമായി വിവാഹമോചനം നടത്തിയപ്പോള്‍ മെലിന്‍ഡയ്ക്ക് 76 ബില്യണ്‍ ഡോളര്‍ അതായത് 631000 കോടി രൂപയാണ് ജീവനാംശമായി നല്‍കേണ്ടി വന്നത്.
