കേരള സംസ്ഥാന സര്‍ക്കാരിന്റെ ഓണം വാരാഘോഷം ഉദ്ഘാടന ചടങ്ങില്‍ പങ്കെടുത്ത തമിഴ് നടന്‍ രവി മോഹന്‍ മുഖ്യമന്ത്രി പിണറായി വിജയനെ പ്രശംസിച്ചു. ഒരു വ്യക്തി രണ്ടുതവണ മുഖ്യമന്ത്രിയാകണമെങ്കില്‍ അദ്ദേഹം മികച്ച രാഷ്ട്രീയ നേതാവ് മാത്രമല്ല, നല്ലൊരു വ്യക്തി കൂടിയായിരിക്കണമെന്ന് രവി മോഹന്‍ പറഞ്ഞു. കൂടാതെ, മുഖ്യമന്ത്രിക്ക് നല്ല ആരോഗ്യം നേരുന്നുവെന്നും അദ്ദേഹം കൂട്ടിച്ചേര്‍ത്തു. സംസ്ഥാന സര്‍ക്കാറിന്റെ ഓണം വാരാഘോഷത്തിന്റെ ഉദ്ഘാടന ചടങ്ങില്‍ മുഖ്യാതിഥിയായി സംസാരിക്കുകയായിരുന്നു രവി മോഹന്‍.
അതേസമയം, മുഖ്യമന്ത്രി പിണറായി വിജയന്‍ രവി മോഹന്റെ സിനിമകളെ മലയാളികള്‍ എന്നും ഹൃദയത്തോട് ചേര്‍ത്തുപിടിച്ചിട്ടുണ്ടെന്ന് വ്യക്തമാക്കി. മലയാള സിനിമയുടെ കലാസാംസ്‌കാരിക രംഗത്തിന്റെ ഭാഗം കൂടിയാണ് നടനെന്നും മുഖ്യമന്ത്രി പറഞ്ഞു. ചടങ്ങിലെ മറ്റൊരു മുഖ്യാതിഥിയായ ബേസില്‍ ജോസഫിനെക്കുറിച്ചും അദ്ദേഹം സംസാരിച്ചു. യുവതലമുറയിലെ പ്രേക്ഷകര്‍ക്കിടയില്‍ ബേസില്‍ ജോസഫ് ഏറെ സ്വീകാര്യനായ ഒരു നടനും സംവിധായകനുമാണെന്ന് മുഖ്യമന്ത്രി അഭിപ്രായപ്പെട്ടു.
മന്ത്രിമാര്‍, പ്രതിപക്ഷ നേതാവ്, എംപിമാര്‍, എംഎല്‍എമാര്‍, മേയര്‍ തുടങ്ങിയ പ്രമുഖ ജനപ്രതിനിധികള്‍ ഉദ്ഘാടന ചടങ്ങിന് സാക്ഷ്യം വഹിച്ചു. യുകെ, ഫ്രാന്‍സ്, വിയറ്റ്‌നാം, ഇന്തോനേഷ്യ, തായ്വാന്‍, ശ്രീലങ്ക, നേപ്പാള്‍, മലേഷ്യ, റൊമാനിയ, ദക്ഷിണകൊറിയ തുടങ്ങി നിരവധി വിദേശ രാജ്യങ്ങളില്‍ നിന്നുള്ള വിനോദസഞ്ചാരികള്‍ ഓണാഘോഷങ്ങള്‍ക്ക് അതിഥികളായി എത്തുമെന്ന പ്രത്യേകതയും ഇത്തവണയുണ്ട്. സെപ്റ്റംബര്‍ 9-ന് വൈകുന്നേരം നടക്കുന്ന ഘോഷയാത്രയോടെ സംസ്ഥാന സര്‍ക്കാരിന്റെ ഈ വര്‍ഷത്തെ ഓണം വാരാഘോഷത്തിന് സമാപനമാകും.
