ഏഴു രാജ്യാന്തര സംഘര്ഷങ്ങളെങ്കിലും അവസാനിപ്പിച്ചതിന് നൊബേല് സമ്മാനം ലഭിച്ചില്ലെങ്കില് അതു തന്റെ രാജ്യത്തിന് അപമാനമാകുമെന്ന് യുഎസ് പ്രസിഡന്റ് ഡോണള്ഡ് ട്രംപ്. ഗാസ സമാധാന പദ്ധതി പ്രഖ്യാപിച്ചതിന് ഒരു ദിവസത്തിനു ശേഷമാണ് സമാധാനത്തിനുള്ള നൊബേല് സമ്മാനത്തിനു വേണ്ടി ട്രംപ് വീണ്ടും അവകാശവാദം ഉന്നയിച്ചത്. യുഎസിലെ സൈനിക ഉദ്യോഗസ്ഥരെ അഭിസംബോധന ചെയ്തു സംസാരിക്കവെയാണ് ട്രംപ് തന്റെ ആഗ്രഹം തുറന്നുപറഞ്ഞത്.
''നിങ്ങള്ക്ക് നൊബേല് സമ്മാനം ലഭിക്കുമോ ? തീര്ച്ചയായും ലഭിക്കില്ല. ഒരു കാര്യവും ചെയ്യാത്ത ഒരാള്ക്ക് അവര് അത് നല്കും. ഞാന് നിങ്ങളോട് പറയുന്നു, അത് നമ്മുടെ രാജ്യത്തിനു വലിയ അപമാനമായിരിക്കും. എനിക്ക് അത് വേണ്ട. എന്നാല് രാജ്യത്തിന് അത് ലഭിക്കണം. 'ഇതുകൂടി (ഗാസ സമാധാന കരാര്) വിജയിച്ചാല്, എട്ട് മാസത്തിനുള്ളില് നമ്മള് എട്ട് യുദ്ധങ്ങള്ക്ക് പരിഹാരം കണ്ടു. അത് വളരെ മികച്ചതാണ്. ആരും ഇന്നുവരെ ഇത് ചെയ്തിട്ടില്ല,' - അദ്ദേഹം കൂട്ടിച്ചേര്ത്തു.
ഈ വര്ഷത്തെ നൊബേല് സമ്മാനങ്ങള് ഒക്ടോബര് 10 മുതല് പ്രഖ്യാപിക്കാനിരിക്കെയാണ് ട്രംപ് ആവകാശവാദം ശക്തമാക്കിയത്. ഇന്ത്യ -പാകിസ്ഥാന് സംഘര്ഷം അവസാനിപ്പിച്ചത് താന് ആണെന്ന് ട്രംപ് പലതവണ അവകാശപ്പെട്ടിരുന്നു.
