കുറച്ചു ദിവസങ്ങള്‍ക്കു മുന്‍പാണ് മിനിസ്‌ക്രീന്‍ താരങ്ങളായ ഡയാന ഹമീദിന്റെയും അമീന്റെയും നിക്കാഹ് കഴിഞ്ഞത്. അടുത്ത കുടുംബാംഗങ്ങളും സുഹൃത്തുക്കളും മാത്രമാണ് ചടങ്ങില്‍ പങ്കെടുത്തത്. ഇപ്പോള്‍ വിവാഹത്തത്തെക്കുറിച്ചും വ്യക്തിജീവിതത്തെക്കുറിച്ചുമൊക്കെയുള്ള വിശേഷങ്ങള്‍ പങ്കുവെച്ചിരിക്കുകയാണ് ഡയാനയും അമീനും. ഇരുവരുടെയും സുഹൃത്തും നടിയുമായ ആതിര മാധവിന്റെ വ്‌ലോഗിലൂടെയാണ് വിശേഷങ്ങള്‍ പങ്കിട്ടത്.
ഈ വര്‍ഷം സെപ്റ്റംബറിലായിരിക്കും തങ്ങളുടെ വിവാഹമെന്നും വിദേശത്തുള്ള തന്റെ സഹോദരന്‍ ലീവിനു വരുന്നതനുസരിച്ചാണ് വിവാഹച്ചടങ്ങുകള്‍ ക്രമീകരിക്കുകയെന്നും അമീന്‍ പറഞ്ഞു. നിക്കാഹിനു ക്ഷണിച്ചില്ല എന്ന പരാതിയുള്ളവര്‍ ഒരുപാടുണ്ടെന്നും അവരെയെല്ലാം വിവാഹത്തിന് ക്ഷണിക്കുമെന്നും അമീന്‍ കൂട്ടിച്ചേര്‍ത്തു.
അമീനുമായുള്ള നിക്കാഹിനു മുന്‍പ് തനിക്ക് മറ്റൊരു വിവാഹം ഉറപ്പിച്ചിരുന്നു എന്നും ഡയാന വെളിപ്പെടുത്തി. ''ഏകദേശം രണ്ട് വര്‍ഷങ്ങള്‍ക്കു മുന്‍പായിരുന്നു അത്. ചില അഭിമുഖങ്ങളില്‍ വിവാഹം ഉറപ്പിച്ചതാണ് എന്നൊക്കെ ഞാന്‍ പറഞ്ഞിരുന്നു. എന്നാല്‍ ആ വിവാഹത്തില്‍ നിന്ന് പിന്നീട് പിന്‍മാറുകയാണ് ഉണ്ടായത്. ഞങ്ങളുടെ നിക്കാഹ് കഴിഞ്ഞപ്പോള്‍ പലരും അന്ന് ഞാന്‍ പറഞ്ഞത് അമീനെപ്പറ്റിയാണോ എന്ന് സ്വാഭാവികമായും സംശയിച്ചു. എന്നാല്‍ ഞങ്ങളുടേത് പ്രണയവിവാഹമേ അല്ല. ഒരുപാട് നാളായി പരിചയിച്ച്, അടുത്തറിഞ്ഞ്, പിന്നെ അതൊരു വിവാഹത്തിലേക്ക് എത്തുമ്പോള്‍ ആണല്ലോ അത് പ്രണയവിവാഹം ആകുക. എന്നാല്‍ ഞങ്ങളുടേത് ഒരു പ്രൊപ്പോസല്‍ ആയിത്തന്നെ വന്നതാണ്. ആതിരയാണ് ഞങ്ങള്‍ക്കിടയിലെ മാച്ച് മേക്കര്‍'', ഡയാന പറഞ്ഞു.
ആതിരയാണ് തങ്ങളുടെ വിവാഹത്തിന് മുന്‍കൈയെടുത്തതെന്നും ഇരുവീട്ടുകാരോടും ആദ്യം സംസാരിച്ചതും അവള്‍ തന്നെയാണെന്നും വിവാഹശേഷം ഡയാനയും അമീനും വെളിപ്പെടുത്തിയിരുന്നു. ''ഒരു വര്‍ഷം മുന്‍പാണ് ഞാന്‍ അമീനെക്കുറിച്ച് ആദ്യം കേള്‍ക്കുന്നത്. എന്റെ ബെസ്റ്റ് ഫ്രണ്ടായ ആതിര മാധവ് അമീന്‍ വര്‍ക്ക് ചെയ്യുന്ന സീരിയലില്‍ അഭിനയിച്ചിരുന്നു. അങ്ങനെ അവര്‍ സുഹൃത്തുക്കളായി. അവളാണ് എന്നോട് നിനക്ക് അമീനെ കല്യാണം കഴിച്ചുകൂടേ എന്ന് ചോദിച്ചത്. നല്ല പയ്യന്‍മാരെ കണ്ടാല്‍ എന്നോട് ഇങ്ങനെ ചോദിക്കുന്ന സ്വഭാവം അവള്‍ക്കുണ്ട്. എന്നോട് ചോദിച്ച അതേ ചോദ്യം അവള്‍ അമീനോടും ചോദിച്ചിരുന്നു'', എന്നും ഡയാന പറഞ്ഞിരുന്നു.
