യുക്മ - ഫസ്റ്റ് കോള്‍ കേരളപൂരം വള്ളംകളി 2025 ന്റെ തയ്യാറെടുപ്പുകള്‍ വളരെ വേഗം പുരോഗമിക്കുകയാണ്. ആഗസ്റ്റ് 30 ശനിയാഴ്ച റോഥര്‍ഹാം മാന്‍വേഴ്‌സ് തടാകത്തില്‍ വെച്ച് നടക്കുന്ന മത്സര വള്ളംകളിയില്‍ 31 ടീമുകള്‍ പങ്കെടുക്കുമ്പോള്‍ ഇക്കുറി യുക്മ ട്രോഫിക്ക് വേണ്ടിയുള്ള പോരാട്ടം ഏറെ കടുത്തതായിരിക്കുമെന്ന് നിസ്സംശയം പറയാം. ഇതാദ്യമായി 11 ടീമുകള്‍ മത്സരിക്കുവാന്‍ എത്തുന്നതോടെ വനിതാ വിഭാഗത്തിലും തീപാറുന്ന പോരാട്ടം പ്രതീക്ഷിക്കാം.
മത്സരത്തില്‍ പങ്കെടുക്കുന്ന 31 ടീമുകളെ 8 ഹീറ്റ്‌സുകളായി തിരിച്ചിരിക്കുകയാണ്. ബോട്ട് ക്‌ളബ്ബുകളുടെ പേരില്‍ രജിസ്റ്റര്‍ ചെയ്തിരിക്കുന്ന ടീമുകള്‍ കേരളത്തിലെ വള്ളംകളി പാരമ്പര്യമനുസരിച്ച് കുട്ടനാടന്‍ ഗ്രാമങ്ങളുടെ പേരിലുള്ള വള്ളങ്ങളിലാണ് മത്സരിക്കുവാന്‍ ഇറങ്ങുന്നത്.
പ്രാഥമിക ഹീറ്റ്‌സുകളില്‍ മത്സരിക്കുന്ന ടീമുകള്‍ സംബന്ധിച്ച തീരുമാനമെടുത്തത് മാന്‍വേഴ്‌സ് ലെയ്ക്ക് ട്രസ്റ്റ് ഓഫീസില്‍ ആഗസ്റ്റ് 9 ശനിയാഴ്ച ചേര്‍ന്ന ക്യാപ്റ്റന്‍മാരുടെ യോഗത്തിലാണ്. മുന്‍ പതിവ് പോലെ നറുക്കെടുപ്പിലൂടെയാണ് ഇത്തവണയും ഹീറ്റ്‌സിലെ ടീമുകളെ തീരുമാനിച്ചത്. ആദ്യ രണ്ട് ഹീറ്റ്‌സുകളില്‍ പങ്കെടുക്കുന്ന ടീമുകള്‍, ക്യാപ്റ്റന്‍മാര്‍, ബോട്ട് ക്‌ളബ്ബ്, വള്ളം എന്നിവ താഴെ നല്‍കുന്നു.
ഹീറ്റ്‌സ് - 1.
A. കാവാലം - മോനിച്ചന്‍ കിഴക്കേച്ചിറ, കൊമ്പന്‍സ് ബോട്ട് ക്‌ളബ്ബ് ബോള്‍ട്ടന്‍.
2022 മുതല്‍ യുക്മ ട്രോഫി വള്ളംകളിയില്‍ ശക്തമായ സാന്നിദ്ധ്യമായി മാറിക്കഴിഞ്ഞ ടീമാണ് മോനിച്ചന്‍ കിഴക്കേച്ചിറ നയിക്കുന്ന കൊമ്പന്‍സ് ബോള്‍ട്ടന്‍. ഇക്കുറി യുക്മ ട്രോഫി വിജയികളാകണമെന്ന ആഗ്രഹത്തില്‍ കഠിനമായ പരിശീലനത്തിന് ശേഷമാണ് ടീം കൊമ്പന്‍സ് മത്സരത്തിനെത്തുന്നത്. തുടര്‍ച്ചയായി ഫൈനലില്‍ എത്തുന്ന ടീമെന്ന നിലയില്‍ എതിരാളികളുടെ പേടി സ്വപ്നമായി മാറിക്കഴിഞ്ഞ ടീമുകളില്‍ ഒന്നാണ് കൊമ്പന്‍സ് ബോള്‍ട്ടന്‍. ടിഫിന്‍ ബോക്‌സ് കവന്‍ട്രിയാണ് കാവാലം വള്ളത്തിലെത്തുന്ന കൊമ്പന്‍സിന്റെ സ്‌പോണ്‍സര്‍.
B. നെടുമുടി - ഡെല്‍വിന്‍ അഞ്ഞൂര്‍, സൌത്ത് എന്‍ഡ് ഓണ്‍ സീ ബോട്ട് ക്‌ളബ്ബ്.
ഡെല്‍വിന്‍ അഞ്ഞൂര്‍ നയിക്കുന്ന ടീം സൌത്ത് എന്‍ഡ് ഓണ്‍ സീ യുക്മ ട്രോഫിയില്‍ തങ്ങളുടെ ശക്തമായ സാന്നിദ്ധ്യം തെളിയിക്കുവാന്‍ കഴിയുമെന്നുള്ള പ്രതീക്ഷയിലാണ് മത്സരിക്കുവാന്‍ എത്തുന്നത്. യുവാക്കള്‍ക്ക് മുന്‍തുക്കമുള്ള ടീം ചിട്ടയായ പരിശീലനം നടത്തിയാണ് മത്സരത്തിനെത്തുന്നത്. നെടുമുടി വള്ളത്തില്‍ മത്സരിക്കുവാന്‍ എത്തുന്ന ടീമിന്റെ സ്‌പോണ്‍സര്‍ മാഗ്നവിഷന്‍ ടിവിയാണ്.
C. അമ്പലപ്പുഴ - അരുണ്‍ ചാക്കോ, കെ.സി.എ ബോട്ട് ക്‌ളബ്ബ് റെഡ്ഡിച്ച്.
അരുണ്‍ ചാക്കോ ക്യാപ്റ്റനായുള്ള കെ സി എ ബോട്ട് ക്‌ളബ്ബ് റെഡ്ഡിച്ച് 2025 യുക്മ ട്രോഫിയിലെ കറുത്ത കുതിരകളാകുവാനുള്ള ശ്രമത്തിലാണ്. ചിട്ടയായ പരിശീലനത്തിലൂടെ മത്സരത്തിനൊരുങ്ങുന്ന ടീം കെ സി എ അമ്പലപ്പുഴ വള്ളത്തിലാണ് മത്സരിക്കുവാന്‍ എത്തുന്നത്. ജിയ ട്രാവത്സ് & ഹോളിഡെയ്‌സാണ് ടീമിന്റെ സ്‌പോണ്‍സര്‍.
D. കായിപ്രം - സജീവ് സെബാസ്റ്റ്യന്‍, നനീട്ടണ്‍ ബോട്ട് ക്‌ളബ്ബ്.
സജീവ് സെബാസ്റ്റ്യന്‍ നയിക്കുന്ന നനീട്ടണ്‍ ബോട്ട് ക്‌ളബ്ബ് കൃത്യവും ചിട്ടയുമാര്‍ന്ന പരിശീലനത്തിന് ശേഷമാണ് യുക്മ ട്രോഫി മത്സരത്തിന് എത്തുന്നത്. യുക്മ ട്രോഫി 2025 ല്‍ ഏറെ പ്രതീക്ഷകളുണര്‍ത്തുന്ന ടീമുകളില്‍ ഒന്നാണ് ടീം നനീട്ടണ്‍. കായിപ്രം വള്ളത്തില്‍ മത്സരിക്കുവാന്‍ എത്തുന്ന ടീം നനീട്ടന്റെ സ്‌പോണ്‍സേഴ്‌സ് തെരേസാസ് ലണ്ടനാണ്.
ഹീറ്റ്‌സ് - 2.
A. കാരിച്ചാല്‍ - ബാബു അബ്രാഹം കളപ്പുരയ്ക്കല്‍, 7 സ്റ്റാര്‍സ് ബോട്ട് ക്‌ളബ്ബ് കവന്‍ട്രി.
യുക്മ ട്രോഫി ആരംഭിച്ച 2017 മുതല്‍ മത്സരത്തിലെ ശക്തമായ സാന്നിദ്ധ്യമായ അപൂര്‍വ്വം ടീമുകളില്‍ ഒന്നാണ് ബാബു അബ്രാഹം കളപ്പുരയ്ക്കല്‍ നയിക്കുന്ന സെവന്‍ സ്റ്റാര്‍സ് കവന്‍ട്രി. ചിട്ടയായ പരിശീലനത്തിലൂടെ വിജയം മാത്രം ലക്ഷ്യമാക്കിയെത്തുന്ന സെവന്‍ സ്റ്റാര്‍സ് തങ്ങളുടെ സ്ഥിരം വള്ളമായ കാരിച്ചാലിലാണ് ഇക്കുറിയും മത്സരിക്കുവാന്‍ എത്തുന്നത്. കവന്‍ട്രിയിലെ കലവറ സൂപ്പര്‍ മാര്‍ക്കറ്റാണ് ടീമിന്റെ സ്‌പോണ്‍സര്‍.
B. നടുഭാഗം - ഷാരോണ്‍ തോമസ് എം.എ, ബി കെ സി എ ബോട്ട് ക്‌ളബ്ബ് ബാണ്‍സ് ലി.
ഷാരോണ്‍ തോമസ് ക്യാപ്റ്റനായുള്ള BKCA ബോട്ട് ക്‌ളബ്ബ് കഴിഞ്ഞ വര്‍ഷം മത്സരിച്ച നടുഭാഗം വള്ളത്തിലാണ് ഇത്തവണയും മത്സരിക്കുവാന്‍ എത്തുന്നത്. കഠിനമായ പരിശീലനത്തിലൂടെ മത്സരത്തിനെത്തുന്ന ടീം BKCA യുക്മ ട്രോഫിയില്‍ തങ്ങളുടെ ശക്തമായ സാന്നിദ്ധ്യം അറിയിക്കുവാനുള്ള ഒരുക്കത്തിലാണ്. മഞ്ചാടി ഫുഡ് പ്രോഡക്ട്‌സാണ് ടീമിന്റെ സ്‌പോണ്‍സേഴ്‌സ്.
C. രാമങ്കരി - ബെക്‌സന്‍ കോശി, ബി എം സി എ ബോട്ട് ക്‌ളബ്ബ് ബാണ്‍സ് ലി.
ബെക്‌സന്‍ കോശി നായകനായുള്ള BMCA ബോട്ട് ക്‌ളബ്ബ് ബാണ്‍സ് ലി ചിട്ടയായ പരിശീലനത്തിലൂടെ ആര്‍ജ്ജിച്ച ആത്മവിശ്വാസം കൈമുതലാക്കിയാണ് യുക്മ ട്രോഫി മത്സരത്തിനെത്തുന്നത്. രാമങ്കരി വള്ളത്തിലാണ് ടീം BMCA ഇക്കുറിയും മത്സരത്തിനെത്തുന്നത്. മോണ്‍സിസ് കിച്ചനാണ് ടീമിന്റെ സ്‌പോണ്‍സേഴ്‌സ്.
D. ആലപ്പാട് - വിനീഷ് പി വിജയന്‍, പൈറേറ്റ്‌സ് ബോട്ട് ക്‌ളബ്ബ്, ഗ്രിംസ്ബി
വിനീഷ് പി വിജയന്‍ ക്യാപ്റ്റനായെത്തുന്ന പൈറേറ്റ്‌സ് ബോട്ട് ക്‌ളബ്ബ് കഴിഞ്ഞ തവണ മത്സരിച്ച ആലപ്പാട് വള്ളത്തിലാണ് ഇത്തവണയും യുക്മ ട്രോഫിയില്‍ മത്സരിക്കുവാന്‍ എത്തുന്നത്. ചിട്ടയാര്‍ന്ന പരിശീലനത്തിലൂടെ കൈവരിച്ച ആത്മവിശ്വാസമാണ് ടീമിന്റെ കരുത്ത്. ഡോക്ടര്‍ മാത്യൂസ് സര്‍ജറിയാണ് ടീമിന്റെ സ്‌പോണ്‍സേഴ്‌സ്.
യുക്മ ദേശീയ പ്രസിഡന്റ് അഡ്വ. എബി സെബാസ്റ്റ്യന്റെ നേതൃത്വത്തില്‍ ദേശീയ ഭാരവാഹികളായ ജയകുമാര്‍ നായര്‍, ഷീജോ വര്‍ഗ്ഗീസ്, വര്‍ഗ്ഗീസ് ഡാനിയല്‍, സ്മിത തോട്ടം, സണ്ണിമോന്‍ മത്തായി, റെയ്‌മോള്‍ നിധീരി, പീറ്റര്‍ താണോലില്‍, ഡോ. ബിജു പെരിങ്ങത്തറ, വള്ളംകളി ജനറല്‍ കണ്‍വീനര്‍ ഡിക്‌സ് ജോര്‍ജ്ജ്, യുക്മ ദേശീയ സമിതി അംഗങ്ങള്‍, റീജിയണല്‍ ഭാരവാഹികള്‍, പോഷക സംഘടനാ ഭാരവാഹികള്‍ തുടങ്ങിയവര്‍ വള്ളംകളിയുടെ തയ്യാറെടുപ്പുകള്‍ നടത്തി വരുന്നു.
കുര്യന്‍ ജോര്‍ജ്ജ്
(നാഷണല്‍ പി.ആര്‍.ഒ & മീഡിയ കോര്‍ഡിനേറ്റര്‍)
