ഏഴാമത് യുക്മ - ഫസ്റ്റ് കോള്‍ കേരളപൂരം വള്ളംകളിയുടെ മുന്നൊരുക്കങ്ങള്‍ അതിവേഗം നടന്ന് വരികയാണ്. ഷെഫീല്‍ഡിനടുത്ത് റോഥര്‍ഹാം മാന്‍വേഴ്‌സ് തടാകത്തില്‍ വെച്ച് ആഗസ്റ്റ് 30 ശനിയാഴ്ച നടക്കുന്ന മത്സരത്തില്‍ 31 ടീമുകള്‍ പൊതു വിഭാഗത്തില്‍ മത്സരിക്കുന്നു. വനിതകളുടെ വിഭാഗത്തില്‍ 11 ടീമുകള്‍ കൂടി മത്സരിക്കുവാന്‍ എത്തുന്നതോടെ ഇരു വിഭാഗങ്ങളിലും ഇക്കുറി കടുത്ത മത്സരം നടക്കുമെന്ന് ഉറപ്പിക്കാം.
മത്സരത്തില്‍ പങ്കെടുക്കുന്ന ടീമുകളെ 8 ഹീറ്റ്‌സുകളായി തിരിച്ചിരിക്കുകയാണ്. ബോട്ട് ക്‌ളബ്ബുകളുടെ പേരില്‍ രജിസ്റ്റര്‍ ചെയ്തിരിക്കുന്ന ടീമുകള്‍ കേരളത്തിലെ വള്ളംകളി പാരമ്പര്യമനുസരിച്ച് കുട്ടനാടന്‍ ഗ്രാമങ്ങളുടെ പേരിലുള്ള വള്ളങ്ങളിലാണ് മത്സരിക്കുവാന്‍ ഇറങ്ങുന്നത്.
പ്രാഥമിക ഹീറ്റ്‌സുകളില്‍ മത്സരിക്കുന്ന ടീമുകള്‍ സംബന്ധിച്ച തീരുമാനമെടുത്തത് മാന്‍വേഴ്‌സ് ലെയ്ക്ക് ട്രസ്റ്റ് ഓഫീസില്‍ ആഗസ്റ്റ് 9 ശനിയാഴ്ച ചേര്‍ന്ന ക്യാപ്റ്റന്‍മാരുടെ യോഗത്തിലാണ്. മുന്‍ പതിവ് പോലെ നറുക്കെടുപ്പിലൂടെയാണ് ഇത്തവണയും ഹീറ്റ്‌സുകളിലെ ടീമുകളെ തീരുമാനിച്ചത്. 3, 4 ഹീറ്റ്‌സുകളില്‍ പങ്കെടുക്കുന്ന ടീമുകള്‍, ക്യാപ്റ്റന്‍മാര്‍, ബോട്ട് ക്ളബ്ബ്, വള്ളം എന്നിവ താഴെ നല്‍കുന്നു.
ഹീറ്റ്‌സ് - 3.
A. ആനാരി - ജോജോ ജോസഫ്, വാറിംഗ്ടണ്‍ ബോട്ട് ക്ളബ്ബ്.
വള്ളംകളിയില്‍ ഏറെ പരിചയ സമ്പന്നനായ ജോജോ ജോസഫ് തിരുനിലം ക്യാപ്റ്റനായുള്ള വാറിംഗ്ടണ്‍ ബോട്ട് ക്ളബ്ബ് ഇക്കുറിയും മത്സരിക്കുന്നത് ആനാരി വള്ളത്തിലാണ്. യുക്മ ട്രോഫിയിലെ സ്ഥിരം സാന്നിദ്ധ്യമായ വാറിംഗ്ടണ്‍ ബോട്ട് ക്ളബ്ബ് ഇത്തവണ ശക്തമായ മത്സരം കാഴ്ച വെയ്ക്കണമെന്ന വാശിയോടെയാണ് എത്തുന്നത്. ഗ്‌ളോബല്‍ സ്റ്റഡി ലിങ്കാണ് ടീമിന്റെ സ്‌പോണ്‍സേഴ്‌സ്.
B. പുന്നമട - രാജീവ് ജോണ്‍, BCMC ബോട്ട് ക്ളബ്ബ് ബര്‍മിംഗ്ഹാം.
BCMC ബര്‍മിംഗ്ഹാമിന്റെ BCMC ബോട്ട് ക്‌ളബ്ബിനെ നയിക്കുന്നത് രാജീവ് ജോണാണ്. കൃത്യതയാര്‍ന്ന പരിശീലനത്തിലൂടെ കൈവരിച്ച ആത്മവിശ്വാസമാണ് ടീമിന്റെ പ്രതീക്ഷ. പുന്നമട വള്ളത്തില്‍ മത്സരിക്കുവാന്‍ എത്തുന്ന ടീമിന്റെ സ്‌പോണ്‍സേഴ്‌സ് ഗ്‌ളോബല്‍ സ്റ്റഡി ലിങ്കാണ്.
C. ചമ്പക്കുളം - ഫിനു പോള്‍സണ്‍, WAM ബോട്ട് ക്ളബ്ബ് വെനസ്ഫീല്‍ഡ്.
ഫിനു പോള്‍സണ്‍ നായകനായെത്തുന്ന WAM ബോട്ട് ക്ളബ്ബ് വെനസ്ഫീല്‍ഡ് ഇത്തവണയും മത്സരിക്കുന്നത് ഏറെ പ്രശസ്തമായ ചമ്പക്കുളം വള്ളത്തിലാണ്. ചിട്ടയാര്‍ന്ന പരിശീലനം നടത്തി വരുന്ന ടീം വിജയം മാത്രം ലക്ഷ്യമാക്കിയാണ് മത്സരത്തിനെത്തുന്നത്. തെരേസാസ് ലണ്ടനാണ് ടീമിന്റെ സ്‌പോണ്‍സേഴ്‌സ്.
D. പായിപ്പാട് - സിജോ കുരുവിള, കാസ്സില്‍ വ്യൂ ബോട്ട് ക്ളബ്ബ് ചെസ്റ്റര്‍ഫീല്‍ഡ്.
സിജോ കുരുവിള നയിക്കുന്ന കാസില്‍ വ്യൂ ബോട്ട് ക്ളബ്ബ് ചെസ്റ്റര്‍ഫീല്‍ഡ് പായിപ്പാട് വള്ളത്തിലാണ് യുക്മ ട്രോഫി മത്സരത്തിനെത്തുന്നത്. ചിട്ടയായ പരിശീലനത്തിന് ശേഷമാണ് ടീം കാസില്‍ വ്യൂ ഇത്തവണ മത്സരത്തിന് ഒരുങ്ങുന്നത്. യുക്മ വള്ളംകളിയുടെ കാറ്ററിംഗ് പാര്‍ട്ട്ണര്‍ കൂടിയായ മൈ ലോക്കല്‍ ഇന്ത്യന്‍ - മട്ടാഞ്ചേരി ടോണ്ടനാണ് ടീമിന്റെ സ്‌പോണ്‍സേഴ്‌സ്.
ഹീറ്റ്‌സ് - 4.
A. തായങ്കരി - ജോയിച്ചന്‍ തോമസ് തായങ്കരി, BMA ബോട്ട് ക്ളബ്ബ് ബസ്സറ്റ്‌ലോ.
കുട്ടന്നാട് തായങ്കരി സ്വദേശി ജോയിച്ചന്‍ തോമസ് തായങ്കരി നയിക്കുന്ന BMA ബോട്ട് ക്ളബ്ബ് ബസ്സറ്റ്‌ലോ മത്സരിക്കുവാന്‍ എത്തുന്നത് തായങ്കരി വള്ളത്തിലാണ്. മുന്‍ വര്‍ഷങ്ങളിലെ മത്സര പരിചയവും കൃത്യതയാര്‍ന്ന പരിശീലനവുമാണ് ടീമിന്റെ കരുത്ത്. ടീമിന്റെ സ്‌പോണ്‍സേഴ്‌സ് നീതിമാന്‍ ഫെയര്‍ & റൈറ്റ്.
B. കൈനകരി - അഖില്‍ ജോര്‍ജ്ജ്, G O A T S ബോട്ട് ക്ളബ്ബ് മാഞ്ചസ്റ്റര്‍.
അഖില്‍ ജോര്‍ജ്ജിന്റെ നായകത്വത്തില്‍ എത്തുന്ന G O A T S ബോട്ട് ക്ളബ്ബ് മാഞ്ചസ്റ്റര്‍ മത്സരത്തിനെത്തുന്നത് തികഞ്ഞ വിജയ പ്രതീക്ഷയിലാണ്. ചിട്ടയായ പരിശീലനം വഴി ലഭിച്ച ആത്മവിശ്വാസമാണ് ടീം G O A T S ന്റെ കരുത്ത്. കൈനകരി വള്ളത്തിലാണ് ടീം മത്സരിക്കുന്നത്. ലവ് ടു കെയര്‍ ലിവര്‍പൂളാണ് ടീമിന്റെ സ്‌പോണ്‍സേഴ്‌സ്.
C. മുട്ടാര്‍ - ബാബു സെബാസ്റ്റ്യന്‍, ഫ്രണ്ട്‌സ് ബോട്ട് ക്ളബ്ബ് കീത്ത്ലി.
ബാബു സെബാസ്റ്റ്യന്‍ ക്യാപ്റ്റനായുള്ള ഫ്രണ്ട്‌സ് ബോട്ട് ക്ളബ്ബ് കീത്ത്ലി മുട്ടാര്‍ വള്ളത്തിലാണ് മത്സരിക്കുവാന്‍ ഒരുങ്ങുന്നത്. കൃത്യമായ പരിശീലനം നടത്തി വരുന്ന ടീം ഫ്രണ്ട്‌സ് യുക്മ ട്രോഫിയില്‍ എതിരാളികള്‍ക്ക് ശക്തമായ മത്സരം കാഴ്ച വെക്കുവാനുള്ള ഒരുക്കത്തിലാണ്. ഏലൂര്‍ കണ്‍സല്‍റ്റന്‍സി യുകെ ലിമിറ്റഡാണ് ടീമിന്റെ സ്‌പോണ്‍സേഴ്‌സ്.
D. പച്ച - ബിനോജി അന്തോണി, PCBC ബോട്ട് ക്ളബ്ബ് യു കെ.
പച്ച വള്ളത്തില്‍ മത്സരത്തിനൊരുങ്ങുന്ന PCBC ബോട്ട് ക്ളബ്ബ് യുകെ യെ നയിക്കുന്നത് വള്ളംകളിയില്‍ ഏറെ പരിചയ സമ്പന്നനായ ബിനോജി അന്തോണിയാണ്. കുട്ടനാട്ടിലെ വള്ളംകളികളില്‍ നിന്ന് ആര്‍ജ്ജിച്ച പരിചയ സമ്പത്താണ് ടീമിന്റെ കരുത്ത്. ഫസ്റ്റ് കോള്‍ ക്വാളിറ്റി ഹെല്‍ത്ത് കെയര്‍ സ്റ്റാഫിങ്ങാണ് ടീമിന്റെ സ്‌പോണ്‍സേഴ്‌സ്.
യുക്മ ദേശീയ പ്രസിഡന്റ് അഡ്വ. എബി സെബാസ്റ്റ്യന്റെ നേതൃത്വത്തില്‍ ദേശീയ ഭാരവാഹികളായ ജയകുമാര്‍ നായര്‍, ഷീജോ വര്‍ഗ്ഗീസ്, വര്‍ഗ്ഗീസ് ഡാനിയല്‍, സ്മിത തോട്ടം, സണ്ണിമോന്‍ മത്തായി, റെയ്‌മോള്‍ നിധീരി, പീറ്റര്‍ താണോലില്‍, ഡോ. ബിജു പെരിങ്ങത്തറ, വള്ളംകളി ജനറല്‍ കണ്‍വീനര്‍ ഡിക്‌സ് ജോര്‍ജജ്, യുക്മ ദേശീയ സമിതി അംഗങ്ങള്‍, റീജിയണല്‍ ഭാരവാഹികള്‍, പോഷക സംഘടന ഭാരവാഹികള്‍ തുടങ്ങിയവര്‍ വള്ളംകളിയുടെ തയ്യാറെടുപ്പുകള്‍ നടത്തി വരുന്നു.
കായികപ്രേമികളുടെ ആവേശമായ വള്ളംകളിയും മലയാളികളുടെ പ്രിയപ്പെട്ട കലാരൂപങ്ങളായ തിരുവാതിരയും തെയ്യവും പുലികളിയും നൃത്ത നൃത്യങ്ങളും സംഗീതവും ആസ്വദിക്കുവാന്‍ മുഴുവന്‍ യുകെ മലയാളികളെയും യുക്മ ദേശീയ സമിതി, ആഗസ്റ്റ് 30 ന് റോഥര്‍ഹാം മാന്‍വേഴ്‌സ് തടാകക്കരയിലേക്ക് സ്വാഗതം ചെയ്യുന്നു.
കുര്യന്‍ ജോര്‍ജ്ജ്
(നാഷണല്‍ പി.ആര്‍.ഒ & മീഡിയ കോര്‍ഡിനേറ്റര്‍)
