തനിക്കെതിരായ ലൈംഗിക ആരോപണങ്ങള്‍ക്ക് പിന്നില്‍ ഗൂഢാലോചന നടന്നുവെന്ന് രാഹുല്‍ മാങ്കൂട്ടത്തില്‍ നേതൃത്വത്തെ അറിയിച്ചു. നേതൃത്വവുമായുള്ള ആശയ വിനിമയത്തിലാണ് ഇക്കാര്യം അറിയിച്ചത്. എന്നാല്‍
ആരോപണങ്ങള്‍ക്ക് രാഹുല്‍ തന്നെ മറുപടി പറയട്ടെ എന്ന നിലപാടിലാണ് കോണ്‍ഗ്രസ് നേതൃത്വമുള്ളത്. പാലക്കാട് എംഎല്‍എ രാഹുല്‍ മാങ്കൂട്ടത്തിലിനെ പാര്‍ട്ടി പ്രാഥമികാംഗത്വത്തില്‍ നിന്ന് കോണ്‍ഗ്രസ് സസ്‌പെന്‍ഡ് ചെയ്തിരുന്നു. പാര്‍ലമെന്ററി പാര്‍ട്ടിയിലും രാഹുലിന് അംഗത്വമുണ്ടാകില്ല.
യൂത്ത് കോണ്‍ഗ്രസ് സംസ്ഥാന അധ്യക്ഷനെ കണ്ടെത്താനുള്ള ചര്‍ച്ചകള്‍ പുനഃരാരംഭിക്കുകയാണ് നേതൃത്വം. അബിന്‍ വര്‍ക്കിയുടെ സ്വാഭാവിക നീതി വാദത്തിന് ബൈലോ ഉപയോഗിച്ചാണ് മറുപക്ഷം മറുപടി നല്‍കുന്നത്. സ്വാഭാവിക നീതി നടപ്പിലാക്കണമെന്നാണ് അബിന്‍ വര്‍ക്കിയുടെ ആവശ്യം. രാഹുലിനെ അധ്യക്ഷനാക്കിയത് വോട്ടിന്റെ മാത്രം അടിസ്ഥാനത്തില്‍ അല്ല ഏറ്റവും അധികം വോട്ട് നേടുന്ന മൂന്നു പേരെ ഇന്റര്‍വ്യൂ നടത്തിയിരുന്നു. രാഹുലിനൊപ്പം അബിന്‍ വര്‍ക്കി, അരിതാ ബാബു എന്നിവരായിരുന്നു ഡല്‍ഹിയില്‍ അഭിമുഖത്തിന് പങ്കെടുത്തത്. രാഹുല്‍ മാറിയ പശ്ചാത്തലത്തില്‍ അബിന്‍ വര്‍ക്കി, അരിതാ ബാബു എന്നിവര്‍ക്കൊപ്പം ഒ.ജെ ജനീഷിനെയും അഭിമുഖത്തിന് വിളിക്കണമെന്നാണ് വാദം.
ബിനു ചുള്ളിയിലിന് പ്രായപരിധി കഴിഞ്ഞെന്നും ഒരു വിഭാഗം ചൂണ്ടിക്കാട്ടി. എന്നാല്‍ വാദം തെറ്റെന്നും പ്രായപരിധി കഴിഞ്ഞിട്ടില്ലെന്നും ബിനു ചുള്ളിയില്‍ പറഞ്ഞു. 1987 മെയ് 10 ന് ശേഷം ജനിച്ചവര്‍ക്ക് മാത്രമേ കമ്മിറ്റിയില്‍ ഉള്‍പ്പെടാന്‍ കഴിയൂവെന്നാണ് ബൈലോ.
