സൂപ്പര്‍ താരത്തില്‍ നിന്നുണ്ടായ മോശം പെരുമാറ്റത്തെ കുറിച്ച് വെളിപ്പെടുത്തി നടിയും ഫാഷന്‍ ഡിസൈനറുമായ ഷമ സിക്കന്ദര്‍. ഒരു പരസ്യ ചിത്രത്തിന്റെ ഷൂട്ടിംഗിനിടെ തന്നെ കടന്നു പിടിച്ച് ആലിംഗനം ചെയ്തു എന്നാണ് ഷമ തുറന്നു പറഞ്ഞിരിക്കുന്നത്. ആദ്യമായിട്ടാണ് അത്തരമൊരു അനുഭവം ഉണ്ടായതെന്നും ഷമ വ്യക്തമാക്കി.
തുടക്കത്തില്‍ ആലിംഗനം ചെയ്യുന്ന രംഗങ്ങള്‍ ഉണ്ടായിരുന്നില്ല. പിന്നീടാണ് രംഗത്തെ കുറിച്ച് പറഞ്ഞത്. ആ നടന്റെ മനസില്‍ അങ്ങനെയൊരു ആഗ്രഹം ഉണ്ടായതായി തോന്നുന്നു. ഒന്നിച്ച് അഭിനയിക്കുമ്പോള്‍ ചില ആളുകളുടെ രീതികള്‍ നമുക്ക് മനസിലാകും. ചിത്രീകരണത്തിനിടെ എനിക്ക് ആഭരണങ്ങള്‍ ഇടുന്ന രംഗങ്ങള്‍ അയാള്‍ കൂട്ടിച്ചേര്‍ത്തു
എന്നെ ആലിംഗനം ചെയ്തു. ആ സ്പര്‍ശനം എനിക്ക് അസ്വസ്ഥതയുണ്ടാക്കി. ഞാന്‍ ഒട്ടനവധി താരങ്ങള്‍ക്കൊപ്പം പ്രവര്‍ത്തിച്ചിട്ടുണ്ട്. എനിക്ക് ഒരുപാട് ആണ് സഹൃത്തുക്കളുണ്ട്. പക്ഷെ ഇതു പോലൊരു അനുഭവം ഉണ്ടായിട്ടില്ല. ഈ സംഭവം എന്നെ ശരിക്കും ഞെട്ടിച്ചു. അയാളൊരു സൂപ്പര്‍സ്റ്റാര്‍ ആണ്.
എന്തിനായിരുന്നു ഇങ്ങനെ ചെയ്തത്? എന്റെ ജീവിതത്തിലെ വളരെ ഞെട്ടിക്കുന്ന സംഭവമായിരുന്നു അത്. ഞാന്‍ അയാളെ ആദ്യമായി കണ്ടപ്പോഴെ, അയാളുടെ മനോഭാവം അസാധാരണമായി തോന്നി. ഇനി എത്ര വലിയ താരമാണെങ്കിലും ഇനിയൊരിക്കലും അയാളോടൊപ്പം അഭിനയിക്കില്ല എന്നാണ് ഷമ സിക്കന്ദര്‍ പറയുന്നത്.
അതേസമയം, ഒരു വളരെ വലിയ താരം ഷൂട്ടിംഗിന് എത്താതിരുന്നതിനാല്‍ ഒരു സിനിമ തനിക്ക് നഷ്ടമായിട്ടുണ്ടെന്നും ഷമ പറയുന്നുണ്ട്. മേക്കപ്പിട്ട് റെഡി ആയി നിന്നെങ്കിലും സൂപ്പര്‍ താരം എത്താതിനാല്‍ ഷൂട്ടിംഗ് കാന്‍സല്‍ ചെയ്തു. പിന്നാലെ തന്നെ ആ സിനിമയില്‍ നിന്നും മാറ്റി, പകരം മറ്റൊരാള്‍ വന്നു. അതൊക്കെ സിനിമയില്‍ ഇപ്പോള്‍ സാധരണമാണ് എന്നും ഷമ വ്യക്തമാക്കി.
