മധ്യപ്രദേശിലെ ഇന്‍ഡോറില്‍ ഒരു ഓര്‍ഡര്‍ പൂര്‍ത്തിയാക്കാന്‍ പോകുന്ന സൊമാറ്റോ ഡെലിവറി ബോയുടെ സാന്താക്ലോസ് വസ്ത്രം നീക്കം ചെയ്ത് 'ഹിന്ദു ജാഗരണ്‍ മഞ്ച്'. സൊമാറ്റോ ഡെലിവറിക്കാരന്‍, സാന്താക്ലോസിന്റെ വേഷം ധരിച്ച്, ബൈക്കില്‍ ഇരിക്കുന്നതും അയാളുടെ വസ്ത്രത്തെക്കുറിച്ച് ചോദ്യം ചെയ്യുന്നതും വീഡിയോയില്‍ കാണാമായിരുന്നു.
''നിങ്ങള്‍ എപ്പോഴെങ്കിലും രാമന്റെ വേഷം ധരിച്ച് ആളുകളുടെ വീടുകളില്‍ പോയിട്ടുണ്ടോ?'' ഡെലിവറി ഏജന്റിനോട് ഒരാള്‍ ചോദിച്ചു. ''ഇല്ല, പക്ഷേ ഇപ്പോള്‍ കമ്പനി എന്നോട് ഈ വേഷം ധരിക്കാന്‍ ആവശ്യപ്പെട്ടു'' എന്നായിരുന്നു ഡെലിവറി ഏജന്റിന്റെ പ്രതികരണം. അതിനുശേഷം, ഡെലിവറി ജോലിക്കാരന്‍ വസ്ത്രം അഴിക്കാന്‍ നിര്‍ബന്ധിതനായി.
ഡെലിവറി തൊഴിലാളികള്‍ സാന്താക്ലോസിന്റെ വേഷം ധരിക്കേണ്ടതിന്റെ ആവശ്യകതയെ ഹിന്ദു ഗ്രൂപ്പിന്റെ ജില്ലാ കണ്‍വീനര്‍ സുമിത് ഹാര്‍ദിയ ചോദ്യം ചെയ്യുകയും ഭൂരിപക്ഷം ഹിന്ദുക്കള്‍ ഉള്ള ഒരു കമ്മ്യൂണിറ്റിയിലാണ് ഡെലിവറികള്‍ നടത്തുന്നതെന്നും വാദിച്ചു. എന്തുകൊണ്ടാണ് അഹിന്ദുക്കളല്ലാത്ത ആഘോഷങ്ങളില്‍ മാത്രം സമാനമായ സംഭവങ്ങള്‍ കാണുന്നതെന്നും അദ്ദേഹം ചോദിച്ചു.
''ഇന്‍ഡോറും ഇന്ത്യയും ഹിന്ദു ഭൂരിപക്ഷമാണ്, പിന്നെ എന്തുകൊണ്ടാണ് ഡെലിവറി ഏജന്റുമാര്‍ക്ക് ഇത്തരം വസ്ത്രങ്ങള്‍ ധരിച്ച് വീടുകളില്‍ പ്രവേശനം നല്‍കുന്നത്? ഹനുമാന്‍ ജയന്തി, രാമനവമി, ദീപാവലി തുടങ്ങിയ ഹിന്ദു ആഘോഷങ്ങളില്‍ അവര്‍ എപ്പോഴെങ്കിലും കാവി വസ്ത്രം ധരിച്ചിട്ടുണ്ടോ?'' സംഭവത്തെക്കുറിച്ച് ചോദിച്ചപ്പോള്‍ സുമിത് ഹാര്‍ദിയ പറഞ്ഞു.
സാന്താക്ലോസ് വസ്ത്രങ്ങളെക്കുറിച്ച് സംസാരിച്ച ഹാര്‍ദിയ, ഇത്തരം പ്രലോഭനങ്ങള്‍ പലപ്പോഴും മതപരിവര്‍ത്തനത്തിന് ഉപയോഗിക്കാറുണ്ടെന്ന് പറഞ്ഞു. ഫുഡ് ഡെലിവറി കമ്പനികളുടെ ഉടമകളുടെ മാനസികാവസ്ഥയെ ഹിന്ദു ഗ്രൂപ്പ് നേതാവ് ചോദ്യം ചെയ്തു. ഏജന്റുമാരെ അത്തരം വസ്ത്രങ്ങള്‍ ധരിക്കുന്നതിന് പിന്നിലെ അവരുടെ ഉദ്ദേശ്യമെന്താണെന്ന് ചോദിച്ചു.
