ഇന്നലെ കൊച്ചി വില്ലിംഗ്ടണ്‍ ഐലന്‍ഡിന് സമീപം ഓട്ടോറിക്ഷയില്‍ നിന്ന് കുഴല്‍പ്പണം കണ്ടെത്തിയ സംഭവത്തില്‍ നിര്‍ണായക വിവരങ്ങള്‍ പുറത്ത്. പണം കൊടുത്ത് വിട്ടത് കൊച്ചി മാര്‍ക്കറ്റ് റോഡിലെ ടെക്‌സ്‌റ്റൈല്‍സ് ഉടമ രാജാമുഹമ്മദ് എന്നയാളാണ്. ഇയാളെ വിശദമായി ചോദ്യം ചെയ്യാന്‍ ഇരിക്കുകയാണ് പൊലീസ്. ആര്‍ക്ക് വേണ്ടിയാണ് പണം കൊണ്ടുവന്നത് എന്ന കാര്യത്തിലും വ്യക്തത വരുത്തും. കേസില്‍ പിടിയിലായ ഓട്ടോ ഡ്രൈവര്‍ തമിഴ്‌നാട് സ്വദേശി രാജഗോപാലിന് പങ്കില്ലെന്ന് കണ്ടെത്തിയിട്ടുണ്ട്.
ഇടക്കൊച്ചി കണങ്ങാട്ട് പാലത്തിന് സമീപം നടന്ന റെയ്ഡില്‍ ഓട്ടോറിക്ഷയില്‍ നിന്ന് 2.70 കോടി രൂപയാണ് പിടികൂടിയത്. മൂന്ന് സഞ്ചികളിലായി 500 ന്റെ 97 നോട്ടുകെട്ടുകളാണ് ഉണ്ടായിരുന്നത്. ഓപ്പറേഷന്‍ ഡീഹണ്ടിന്റെ ഭാഗമായി നടന്ന പരിശോധനയിലാണ് കൊച്ചി ഹാര്‍ബര്‍ പൊലീസ് കുഴല്‍പ്പണം കണ്ടെത്തിയത്. പണം കൈമാറാനായി കാത്തുനില്‍ക്കുന്നതിനിടെയാണ് ഇവര്‍ പൊലീസ് പിടിയിലായത്. പൊലീസിനെ കണ്ട് ഓട്ടോ ഡ്രൈവറും കൂടെ ഉണ്ടായിരുന്ന ആളും പരുങ്ങിയതോടെ വാഹനം പരിശോധിക്കുകയായിരുന്നു.
ഓട്ടോ ഡ്രൈവര്‍ തമിഴ്‌നാട് സ്വദേശി രാജഗോപാല്‍ ബീഹാര്‍ സ്വദേശി സഭിന്‍ അഹമ്മദ് എന്നിവരാണ് പൊലീസ് കസ്റ്റഡിയിലുള്ളത്. ഇരുവരുംതമ്മില്‍ പരസ്പരം ബന്ധമില്ലെന്നാണ് പറയുന്നത്. പണം നഗരത്തിലെ വ്യാപാരി കൊടുത്തുവിട്ടതാണെന്നും ഭൂമി വാങ്ങാന്‍ കൊണ്ട് വന്നതാണെന്നുമായിരുന്നു ഇവര്‍ മൊഴി നല്‍കിയത്.
