വഖഫ് ചര്‍ച്ചയില്‍ കോണ്‍ഗ്രസിനെ വിമര്‍ശിച്ച് ഇകെ വിഭാഗം സമസ്ത മുഖപത്രമായ സുപ്രഭാതം. സുപ്രഭാതത്തിന്റെ മുഖപ്രസംഗത്തില്‍ വയനാട് എംപി പ്രിയങ്ക ഗാന്ധിക്കെതിരെ വിമര്‍ശനമുണ്ട്. വിപ് ലംഘിച്ച് പ്രിയങ്ക ഗാന്ധി പാര്‍ലമെന്റില്‍ എത്താതിരുന്നത് കളങ്കമായെന്നു മുഖപ്രസംഗം വിലയിരുത്തുന്നു. രാഹുല്‍ ഗാന്ധി പാര്‍ലമെന്റില്‍ സംസാരിക്കാതിരുന്നതിനെയും സുപ്രഭാതം വിമര്‍ശിക്കുന്നുണ്ട്.
'ഇനി നിയമ പോരാട്ടത്തിന്റെ കാലം' എന്ന തലക്കെട്ടിലുള്ള മുഖപ്രസംഗത്തിലെ വിമര്‍ശനങ്ങള്‍ ഇങ്ങനെ;-
''ലോക്‌സഭയില്‍ രാജ്യം ഏറെ പ്രതീക്ഷയോടെ നോക്കുന്ന വയനാട് എംപി പ്രിയങ്ക ഗാന്ധി വിപ് ലംഘിച്ച് പാര്‍ലമെന്റില്‍ എത്തിയില്ലെന്നത് കളങ്കമായി. മുസ്ലിംകളുടെ ഭരണഘടനാവകാശങ്ങള്‍ ബിജെപി ബുള്‍ഡോസര്‍ ചെയ്യുമ്പോള്‍ പ്രിയങ്കാ ഗാന്ധി എവിടെയായിരുന്നുവെന്ന ചോദ്യം എക്കാലത്തും മായാതെ നില്‍ക്കും. രാജ്യത്തിന്റെ ഐക്യം തകര്‍ക്കുന്ന ബില്ലില്‍ പ്രതിപക്ഷ നേതാവ് എന്തുകൊണ്ട് സംസാരിച്ചില്ലെന്ന ചോദ്യവും ഉയര്‍ന്നു തന്നെ നില്‍ക്കും.
ഇനി നിയമപോരാട്ടത്തിന്റെയും രാഷ്ട്രീയസമരങ്ങളുടെയും കാലമാണ്. മതേതരസമൂഹം ഒന്നിച്ചുനിന്ന് ജനാധിപത്യത്തിന്റെ ആത്മാവിനെ നിലനിര്‍ത്തേണ്ട നാളുകളാണ് വരുന്നത്. അപ്പോള്‍ ആരൊക്കെ എവിടെയൊക്കെ ഉണ്ടാകുമെന്ന ഉറ്റുനോട്ടത്തിലാണ് ഭാവി ഇന്ത്യ''.
