ഫ്രാന്‍സിസ് മാര്‍പ്പാപ്പയുടെ മരണത്തില്‍ അനുശോചനം രേഖപ്പെടുത്തി സമൂഹ മാധ്യമത്തില്‍ പങ്കുവെച്ച കുറിപ്പ് പിന്‍വലിച്ച് ഇസ്രയേല്‍. 'ശാന്തമായി വിശ്രമിക്കു ഫ്രാന്‍സിസ് മാര്‍പ്പാപ്പ. അദ്ദേഹത്തിന്റെ ഓര്‍മ അനുഗ്രഹമായിത്തീരട്ടെ'- എന്നായിരുന്നു ഇസ്രയേലിന്റെ കുറിപ്പ്.
ഒപ്പം ജറുസലിലെ പശ്ചിമ മതില്‍ സന്ദര്‍ശിച്ച മാര്‍പാപ്പയുടെ ചിത്രവും ഇസ്രയേല്‍ ഔദ്യോഗിക എക്‌സ് അക്കൗണ്ടില്‍ പങ്കുവെച്ചിട്ടുണ്ടായിരുന്നു. എന്നാല്‍ പിന്നാലെ ഇതു പിന്‍വലിച്ചു. അനുശോചനം പിന്‍വലിച്ചതിന്റെ കാരണം ഇസ്രയേല്‍ വ്യക്തമാക്കിയില്ല.
ഇസ്രയേലിനെതിരെ ഫ്രാന്‍സിസ് മാര്‍പ്പാപ്പ പ്രസ്താവനകള്‍ നടത്തിയിട്ടുണ്ടെന്നും പിഴവ് മൂലമാണ് അനുശോചനം സമൂഹമാധ്യമത്തില്‍ പോസ്റ്റു ചെയ്തതെന്നും വിദേശകാര്യ മന്ത്രാലയ ഉദ്യോഗസ്ഥരെ ഉദ്ധരിച്ച് ജറുസലം പോസ്റ്റ് റിപ്പോര്‍ട്ടു ചെയ്തു. എന്നാല്‍ ഔദ്യോഗികമായി ഇതേ കുറിച്ച് പ്രതികരിക്കാന്‍ ഇസ്രയേല്‍ തയാറായിട്ടില്ല.
